鍾鎮濤（阿B）女友范姜為了令小B女鍾懿學習多一點中國傳統文化，早前趁春節兩母女一起炮製紙黏土牛牛公仔，不過耐心的范姜VS好動的小B女，合拍程度有待改善。范姜謂現年4歲的鍾懿，在新春只學識即場拆利是及魚蝦蟹，不過在年初一也會跟哥哥姐姐一起跪地斟茶給長輩。
范姜與鍾鎮濤所生、現年4歲多的囡囡鍾懿（Blythe），早前跟隨阿B與章小蕙所生的嘉浚（BonBon）及嘉晴（Tinka），一家五口到范姜的台灣老家過新年，范姜表示節日是小B女學習節令的活動教學，同時培養親子感情。
盼女兒尊師重道
早前范姜帶了小B女一齊學造紙黏土牛牛「母女」公仔擺設應節，她透露小B女現上學，漸漸開始有節日意識，她說：「好似11月開始已經成日問我幾時聖誕節，幾時boxingday，新年呢個節日喺佢腦海入面，只有拆利是、魚蝦蟹呢個concept，所以都好想佢學多一啲農曆新年習俗同文化。」
范姜透露阿B是個注重中國傳統的人：「好似新年年初一我哋都會着中國衫跪地同長輩斟茶，𠵱家我哋都要求3個仔女咁做，BonBon同Tinka都做緊。」范姜十分認同現今小朋友要學多一點中國文化，她說：「好想個女學識尊師重道，呢啲係終生受用。」
聲稱單身𢭃利是
談到在台灣過年，范姜透露台灣人仍遵守「守歲」的習俗，她說：「即係年三十為父母祈福唔瞓，Blythe舊年都有試，不過佢到夜晚11點幾已經瞓咗。」范姜更笑言現在還可以𢭃利是，她說：「我都未結婚，自己係single，仲可以𢭃利是，阿倫（譚詠麟）都有派利是畀我，所以係其中一個原因唔結婚住。」
問與阿B有否結婚計劃，她說：「𠵱家搏殺緊，等佢穩定啲，同埋自己結婚唔係想為一張結婚證書，係想要有一個好難忘、好正嘅party，Blythe都識得笑我，話爹哋、哥哥、家姐同自己都係姓Bee，而我唔係，知我仲係single。」
採訪：RitaLeung
攝影：RickyIp
服裝提供：Shiatzy（范姜）
場地提供：香港黏土藝術學院