牛年邊個英超領隊最快冇咗份工？唔使諗，我求大俠一定估係樸茨茅夫嘅阿當斯。佢隊波前晚以1:3敗走富咸後，連續8場英超聯冇贏過，睇嚟阿當斯都開始聞到魷魚香嘞！
啲運程書講屬馬嘅人喺牛年事業運唔錯，我求大俠原本都以為係馬仔嘅阿當斯（生於66年10月）由鼠年進入牛年後有運行，但睇怕應該唔似。
樸茅季初走咗哈利列納後，大家都對接手嘅阿當斯寄予厚望，點知隊波越打越差，喺歐協盃出局同埋喺英足盃衞冕失敗之餘，英超嘅成績仲屎到你唔信，由舊年11月尾開始未贏過，前晚輸俾富咸後，對上8場錄得2和6負。據樸茅一個知情人士表示：「查實主席之前都開始質疑阿當斯嘅領軍能力。球隊家陣仲輸埋俾富咸，睇嚟阿當斯都唔捱得幾耐。」
自稱盡晒力唔會請辭
現年42歲嘅阿當斯就咁解釋：「過去兩個月我哋喺場內外都遇到好多問題，我經已盡晒力㗎啦。」而阿當斯仲話，佢會帶領球隊戰鬥到底，言下之意即係唔會辭職。講真，以前效力阿仙奴係星級後衞嘅阿當斯，同另一位英格蘭名宿白賴仁笠臣一樣，踢波一流但教波九流，有傳之前佢教低組別球隊韋甘比都試過被炒魷；更何況球隊變動咁大，走咗狄亞拉同廸科爾，又有柏巴廸奧普長「唞」，叫阿當斯點化腐朽為神奇。話時話，樸茅喺前晚場波有卡蘭積卡拉傷鼠蹊，可能又要長「唞」，加埋賓納又唔出得，下場主場對利物浦睇嚟都冇運行。
開危機會議隨時收信
聽聞阿當斯日內會同高層開危機會議，唔係我求大俠咒佢，睇嚟佢大有機會收到大信封。樸茅雖則表現差，但好彩熱刺、史篤城、紐卡素、布力般、米堡同西布朗都唔見得比佢哋好，未計禮拜日嘅戰果，佢哋7隊之間只有兩分差距，榜尾形勢亂過亂世佳人。
講開又講，樸茅前領隊哈利列納教緊嘅熱刺，都唔好得佢哋好多，雖則入咗英聯盃決賽（會同曼聯爭冠軍），但近8場聯賽只係贏一場咁多。而佢哋前球員廸科爾仲慘，無端端喺熱刺練習時重創要休戰一個月。唔通樸茅喺哈利列納同廸科爾走佬後後搵人打佢哋小人？