睇新聞見到一單旅遊期間嘅車禍，有時意外嘅嘢真係預計唔到，保險始終唔少得。敏妮blog有位朋友留言話，由於budget有限，所以買咗份定期壽險。
不過敏妮同好多朋友講開定期壽險，佢哋都會有同一個反應，「吓，供咗啲錢冇得攞番，咪好唔抵！」到最後，佢哋寧願縮細啲保額，都唔會買定期壽險。
買保險咪博攞番
咁係好錯嘅做法！首先買保險係要買個保障，如果保障唔足，到有事發生時一樣感到徬徨，咁買份保險嚟有乜用，盞嘥錢。不過，有好多朋友就係因為怕嘥錢，所以即使知道自己落錯咗決定，仍然硬着頭皮繼續，博翻身，結果仲嘥錢。
敏妮有位朋友，前年開始月供基金，最近見回報大跌，想停供，問敏妮意見。月供基金係用平均成本法入市，賣點係低位時可以買多啲，貴嘅時候就買少啲，如果投資產品長線向上，咁就會賺錢，相反就要蝕。喺呢啲前景唔明朗嘅時候，敏妮唔敢畀追揸沽嘅建議，但其實除非你唔睇好前景，又或者等錢使，否則好少會將長線嘅投資變現，既然係咁，即係呢位朋友都唔睇好自己嘅投資啦。
由於朋友所供嘅只係銀行月供基金計劃，定期定額買入基金單位，所以唔會有斷供要罰錢嘅罰則，易嚟易去。不過，佢仍然要諗揸住啲基金單位，抑或提早贖回。
睇淡前景及早止蝕
家陣嘅市況咁波動，佢買嗰啲基金賬面損失唔少，好彩佢供咗唔係太耐，家陣斬纜都唔係好甘，所以可以好瀟灑咁停供，加上佢唔睇好揸住嘅基金未來前景，所以要求提早贖回亦唔係問題，喺呢啲市況，最緊要學識止蝕，始終佢供得唔多，前景又唔係咁好，咪輸少當贏囉！
溫敏妮
http://wanmanli.com/blogs/