新年後，利是成績未曾點算，腸胃先告急。人生最折墮的一種痛苦，叫做食滯咗。團年飯開年飯乜飯物飯輪流轟炸，如今望見肥牛，立即想嘔，口中痱滋比桃花開得更燦爛。「去鹿兒島，食！」仲食？但面對頭咁大個爽甜蘿蔔、清澈金槍魚湯拉麵，就算幾肚滿腸肥，都仍要塞下肚。都係嗰句，食埋今次先算。
記者、攝影：劉嘉蕙
鳴謝：香港快運航空公司、九州觀光推進機構、鹿兒島縣觀光連盟
口感要似西瓜
嗰頭自怨食得太多，但晚餐不覺又吞了白飯三大碗。
日本米雖香韌美味難以抵擋，然而真正令人欲罷不能的，是蘿蔔亁。當晚我不理眾人目光，來回自助餐桌添亁補飯幾十回，猶如癡漢，口中念念有辭：「我要托幾包蘿蔔亁返去！」
靚蘿蔔亁，考醃製功夫，也講原料質素。九州鹿兒島上的活火山櫻島，蘿蔔特壯，隨便一個都能長到10至20公斤重，腰圍1.4米，最重一個達30公斤，入過健力氏。食味如何？比討論「有冇渣」更高層次，他們追求的，是蘿蔔要有「西瓜咁嘅口感」，生食甜脆，帶爽；熟食保持水潤清甜，所以才食到重久伯伯一家幾口面色紅潤、身壯力健，就是要伯伯抱起兩個各20公斤重蘿蔔影足5分鐘相，也面不改容。「蘿蔔呢，我哋唔係亂種！通常8月播種，一個區播10粒種子，到10月，揀最靚5個蘿蔔留低，跟住5揀3，3揀1，最後全部靚嘢畀晒佢，先至種到肥肥白白。」原來種蘿蔔講究優生學嘅。
我個仔未結囗㗎
櫻島處於活火山帶，單是2008年就爆過80多次，故人口一直不多，留下來的勇士大都是務農人家。人種的蘿蔔，因肯下工夫，要多肥就有多肥。我們一群記者在蘿蔔田玩了一個小時，決定起行時，重久伯伯像怕錯失良機般，忽然指指身旁一直默默勞動的橙哥哥，說出第一句與蘿蔔無關的話：「呢個我個仔呀，獨身，希望可以搵到個好女仔同佢結婚！」橙哥哥笑了，臉比剛才更紅。
念在蘿蔔香又甜，我豪捐珍貴版位替你呼籲！有合眼緣讀者請與本人洽，本人願收取蘿蔔作媒人費，謝！
重久清隆伯伯的蘿蔔園
地址：鹿兒島縣鹿兒島市櫻島白濱町
電話：（81）99-2933257
＊蘿蔔園不是觀光農場，如有意參觀，宜先致電通知。櫻島蘿蔔在一般小店或市場有售，每個約$172。
金槍魚拉麵響朵
鹿兒島拉麵，出名湯稠味濃，想清清哋食碗麵，有人介紹鹿兒島西面串木野市，有道金槍魚拉麵，是當地的救市名物，全市人口3萬，金槍魚拉麵年銷量18萬碗。金槍魚拉麵的成功，原來是計算出來。話說串木野市原是普通城市，為了谷旅遊業，大家決定由飲食界8位高人出馬，利用當地名產加創意，搞些獨特口味的食品。在九州做拉麵，對手很多，因當地黑豚和豬骨湯底早有江湖地位，想出位，他們想出以清制濃──因串木野市的金槍魚產量全日第二，於是便放入拉麵搞創意。經研發後，金槍魚拉麵誕生了：首先是三片紅彤彤金槍魚刺身放在麵上，然後你會發現拉麵的湯清澈見底，單憑這兩點，令它先聲奪人。
隨着上枱，有wasabi一碟。店員教我們食前撈兩撈，去除腥味。食後，眾人反應不一，有人覺得怪，有人覺得清爽，我則覺魚湯底有點港式風味，味道不錯，但請不要說我是垃圾口便好，多謝。
味工房本店
地址：鹿兒島縣串木野市北濱町4番地
網址： http://a-misono.com
黑醋Spray咪亂噴
在鹿兒島，我買了黑醋作手信送畀阿媽，佢終於讚我是注重健康的好寶寶。日本黑醋有多麼健康多麼醇香，阿媽已經常提及，甚至會無時無刻斟一杯叫你飲咗佢。在鹿兒島，本人對黑醋有了新的體會，希望透過本文跟各位阿媽分享，以促進親子關係。
1.呷醋，不用次次明刀明槍，學吓日本人黑醋入饌，頭盤沙律湯至主菜，全部都陰啲陰啲下幾滴，易入口又唔太酸，家庭主婦畀啲創意先得㗎！
2.新出便攜式噴霧裝黑醋，外形得意像保濕spray，女士見到一定歡喜。但阿媽請不要亂噴，我食緊咖喱魚蛋你加醋會好怪味㗎！
黑酢本舖桷志田
地址：鹿兒島縣霧島市福山町福山字大田311-2
網址： http://www.kakuida.com/
出門提一提
簽證：持特區護照及BNO可免簽證。查詢：25221184（日本駐港領事館）
機票：香港快運航空直航來回鹿兒島，逢星期三、六出發，票價$3,230起。查詢：31511888（香港快運航空）
貨幣：1港元約兌11.56日圓（文中價錢已折算港元）
電壓：100V，雙扁腳插座
下周日本鹿兒島 天陰，9-15℃
