有心唔怕遲，10月都係拜年時，之不過今日已是年初八，打工仔怕且都係今日開工囉，希望大家新年發個新年財，賺到好多張金牛，買部牛年首部新款MPV日版ToyotaEstima，去舊迎新，開工大吉！
記者：梁美甜
攝影：陳盛臣
Model：Ruby
一新：款新賣舊價
日圓係咁升，仲要夠晒硬淨，進口日貨平極有限，勢估唔到全新2009年款小改款ToyotaEstima（港版為Previa）個價都只係34萬左右，同樣係配有全車大包圍嘅標準版2.4七座MPV車型，上一代全新車都要34.4萬左右，兩部新車同價任你揀，唔使教都知點揀喇，正值春節，講意頭當然咩都要新，牛年第一新（MPV車），就算同上一代同價都要旺一旺求番個意頭，去舊迎新，直頭精神爽利㖭喇！
二新：偈新更爽更慳
要數小改款，新車與上一代最大分別應該係個波箱，新一代Estima都有2.4以及3.5公升型號，以2.4而言，排氣量不變但波箱則由原本嘅四前速半自動波換上SuperCVT-i無段變速系統，加上標準配備轉向輔助系統嘅S-VSC，揸起上嚟，全新Estima比上一代更爽快利落，尤其入彎，感覺輕鬆又穩定，全新CVT波箱出名慳油，新款舊價又好玩咗，都幾疏肝，咩都手到拿來喇！
三新：設計更富線條
新車好多時都多咗唔少新配備同設計，而09年小改款Estima亦再一次體現呢點。話明係小改款，改動唔算多，不過距上一代Estima而言都有成十年時間，所以呢部改款後全新Estima剛於上年底聖誕節期間喺日本首次登場，唔多唔少都叫人期待。新車由鬼面罩以至頭燈、尾燈、尾翼都進行修改，尤其係尾燈部份，新式之餘仲刻意造成凸出線條，令尾部線條更為突出及硬淨。內裝方面亦換上新式桃木飾料、方向盤附有定速裝置、全新米色絲絨座椅，小節盡顯細心，更切合潮流用家所需。新車新偈波箱動力新設計，三「新」有幸，牛年就幸福滿載。
規格
售價：$339,000起
引擎：2,362c.c.直四
馬力：170ps/6,000rpm
扭力：22.8kgm/4,000rpm
傳動：SuperCVT-i無段變速系統
查詢：富利堡（28776700）