情人節又稱「男士受難節」，眼看身邊兄弟們開始愁眉苦臉，為着2月14當日點樣慶祝而絞盡腦汁，期望會得到女友的讚賞、獻吻、甚至以身相許……花錢事小，失面子事大。兄弟！唔使再愁啦，皆因仿古帆船「濟民號」當日會接載一對對情侶揚帆出海賞夜景，行程活動一早設計好，再唔使左度右度咁傷神！
記者：吳允冲
攝影：梁細權
模特兒：Matthew、Jenny@StageModels
荷李活星級帆船
「濟民號」外形充滿中世紀的歐洲味，令人想起《魔盜王》的海盜船，就算閣下沒有JohnnyDepp的型格，都可以幻想女友是KeiraKnightly。「濟民號」本是為了1978年由米路吉遜的電影《叛逆巡航》而建，船身設計仿照220年前英國航海史上的名船H.M.A.V.Bounty，廿多年間曾用作拍攝多部電影及電視劇，今次為着「愛的船窩」情人節海上遊首次向公眾開放，載客量有限，只可接載25對情侶出海。先到先得，預訂請快手。
04:30pm穿宮廷服 遊維港看夕陽
2月14當日由中環三號碼頭出發。風大浪大，記得上船前食定暈浪丸，保暖頸巾、大褸當然不能少，咁樣喺女友面前先顯得你細心體貼，頭髮最緊要用hairspray定型，在甲板上睇風景時先至唔會吹到披頭散髮。上船後不妨飲杯香檳warmup吓，吹着海風傾心事。一邊喝着紅、白酒及六款情人節cocktail，一邊享受芝士等小食，心情都輕鬆不少。要影相留念，船上有一套歐洲宮廷服可供租用（價錢待定），由專業攝影師操刀影相，以橙紅色的夕陽做背景，拍埋MV都仲得﹗
06:30pm食住睇廸士尼煙花
黃昏後徐徐駛到愉景灣，是時候去到碼頭旁的Zaks享受情人節晚餐。晚餐包括餐湯、頭盤龍蝦、三選一的主菜及葡萄酒一杯，仲送啤啤熊一隻。坐在室外位置，更可以遠眺對岸的廸士尼煙花表演。仲未夠浪漫？飯後可以去附近的沙灘漫步，當日沙灘上會點起心形的燭光圖案，老土但係絕對煞食。
甜到漏甜品buffet
之前晚餐無甜品是否有點兒若有所失？好戲在後頭，回程特設的甜品buffet，由甜品巧手Kennes精心炮製，三十款甜品任食！只怕你胃部不夠空間容納咁多甜品，Kennes仲會即場製作三款甜品：火焰雪山、意大利檸檬Tiramisu、英式EtonMess，為甜蜜的航程畫上完美的句號。
落手整愛心曲奇
兩個鐘船程，也不只是吃吃喝喝看風景。要增進感情，小兩口子可以一齊整餅，浪漫程度不輸張曼玉同周星馳整陶瓷。將師傅預先搓好的麵糰倒模，焗出一塊塊愛心曲奇，更可用朱古力在曲奇上寫字，將不敢說的肉麻字句寫在曲奇上，「我愛你」、「嫁畀我」……未食都甜到漏。
「濟民號」《愛的船窩》情人節海上遊
「溫馨浪漫遊」（黃昏遊+晚餐+晚上遊） $3,850兩位
「醉人黃昏遊」（中環往愉景灣） $1,600兩位
「甜蜜晚上遊」（愉景灣往中環） $1,300兩位
查詢電話：82093399
網址： http://www.magicalmoment.com.hk