年初三跑馬，雖然沙田場內人頭湧湧，人龍處處，但睇番數字，原來與去年比較，丁財兩不旺，投注額下跌7.4%，只有十億四千五百萬元，係十年來第四差，與最好一年（二○○○）比較，少咗三億五千八百萬元，近25.5%，咪話唔得人驚。香港人口九年來冇少到，但投注額大減，雖然話今年經濟前景曳，好多人害怕失業/減薪/凍薪，但馬場投注額無法恢復舊觀，豈止馬會着急，如果曾特首與佢嘅管治團隊（還是內有家鬼？）有啲社會敏感度嘅話，佢哋應該諗深啲，睇遠啲，倘若一百五十年來嘅香港賽馬文化有所損傷，逐漸陰吓陰吓嘅話，受到傷害嘅不單止是本地志願機構及慈善事業，曾特首、曾司長及曾局長三位曾氏宗親要想一想，究竟係佢哋決定本港賽馬方向還是蔡志森之流決定香港賽馬政策？
閒話講完，講番初三賽馬，會員廂房內見到唔少稀客，大概係留港不出外度假一群，反而到馬場一行趁高興，但自不然唔會投注好多，只係玩吓啫。呢日左丁山冇乜運，下注混合過關三穿一，以為中咗去收錢，點知打回票，因為五場二號填錯咗五場三號，唯有長嘆一聲。第五場二號就係老友披圖梁嘅「正本仁心」，事前與披圖通短訊，佢話應該贏得，但熱得厲害，只有二點三倍，想贏多啲，唯有靠過關嘅啫，結果「正本仁心」在神奇小子蔡明紹胯下，輕易取勝，而左丁山居然填錯過關飛，贏得雞碎咁多，呢隻「正本仁心」評分未盡，今季仍然有得贏，披圖有運嘅話，可以拉多兩次頭馬。有啲老友講，披圖係維他命營養專家，佢嘅自然療法以草本維他命丸（不同市面之各類維他命丸）為主，佢唔知道有冇向練馬師告東尼教路，增強「正本仁心」食料之維他命呢？記得十零年前一位馬主識得氣功，見佢自己隻馬次次輸，於是入馬房探馬時，成日用掌心為馬兒按摩，狀甚嚴肅，據講係為隻馬用氣功治療喎！做馬主梗係希望隻馬贏，但贏一場頭馬，頗傷腦筋，要做好多部署與花費不少練馬師心機，如披圖贏馬咁易者，堪稱幸運兒也。