一周兩件呢次主打一門兩傑，第一隻麗豐（1125），絕對係賣大包之列。麗豐最新NAV0.86元，現價（0.103元）折讓高達88%，內房股當中，麗豐折讓係數一數二。
麗豐手頭物業土儲總樓面達到1240萬平方呎。要咁睇，呢期金融海嘯橫風橫雨，但麗豐好多項目將喺後年逐步落成，應該配合到經濟再起飛步伐，物業增值有價。只係保守計數，麗豐土儲每方呎增值50蚊，已經可以為集團帶嚟6.2億銀增值，麗豐最新市值，不過講緊8.2億銀。連埋增值計，麗豐NAV折讓上到近90%，吸引到爆。
再講，麗豐淨借貸比率得11%，而第二大股東嘉德置地（20%權益），係星洲淡馬錫地產旗艦，麗豐有超級大孖沙股東背景，穩陣到痹。呢轉買麗豐，係咁意博翻一番，麗豐價見0.206元，NAV折讓仲高達78%，目標價亦未有耐上番嘉德置地入股成本價0.40元水位。
麗展大把炒上空間
麗展（488）NAV0.52元，現價（0.116元）折讓達到78%，同上邊麗豐一樣，折讓吸引到痹。集團家陣喺中環麗嘉酒店重建項目，重建基準市值35億銀，麗展佔一半權益，重估市值講緊17.5億銀，麗展市值都係得16億銀。單一項目已經超出集團市值，真係殘到爆。又睇走勢，麗展呢半個月，整咗支上升旗，對上星期五，有勢想破位，齋計量度目標，上到0.20元，現價接近翻一番，但目標價NAV折讓，仲講緊60%，實情大把炒上空間。
錢雋