公仔箱姐仔「司機」入咗行都有幾年，都算順風順水搵到錢，不過佢份人就好慳家唔識做人，所以好多幕後人員對佢嘅態度麻麻哋。
事關司機係唔同其他姐仔咁識收買人心，好似開工時請幕後飲飲食食，所以班員工對其他姐仔服侍周到，對司機就呼呼喝喝。
似臨記開工
關仁聽二五講，有次司機同另一位姐仔「皆因」一齊做騷，佢哋喺服裝間試衫，幾個人圍埋皆因度服侍，但司機就自己喺堆鞋度揀鞋，啲鞋仲係好鬼核凸。二五話司機揀鞋個情況，好似臨記揀開工衫咁，後來有服裝指導行過，忍唔住話堆鞋點着得落，跟住帶佢去另一地方揀靚鞋，司機先可以靚靚咁做騷咋。
Textby關仁
