煲呔反口覆舌，以金融海嘯為藉口押後政改諮詢，雖然又放風話會退稅派錢，泛民當然唔會俾呢啲招數轉移視線。民主黨繼早前寫咗「可恥」兩個大字送畀煲呔，噚日再由仁哥同卿姐帶領，舉行民主行大運，操上太平山頂，以二人三足方式環繞山頂行咗一圈，最後喺山頂插上爭取2012雙普選嘅旗幟。
玩二人三足唔係咁易，唔小心隨時PK搞到損手爛腳，八方見到揸住支大旗嘅民主黨總幹事陳家偉同佢囝囝都玩到索晒氣。民主黨噚日嘅行動，就係要話畀煲呔聽，爭取民主之路雖然唔易走，但點都唔可以縮沙，要努力達至普選目標。
煲呔今日的我打倒昨日的我，民主黨話唔會就咁算數，反擊行動會一浪接一浪。仁哥同八方講，已準備今個月11號喺立法會會議上提出動議，譴責煲呔未有實踐施政報告許下嘅承諾，拖延政改諮詢，失信於民。新年流流，八方查實真係唔想成日提住煲呔個名，費事搞到大家冇晒mood，不過真係希望佢唔好睜眼講大話，經濟環境差同普選係完全兩回事，唔好低估香港人嘅智慧以為可以蒙混過關。