新界王劉皇發獲煲呔委任入行會，被指涉及政治利益交易，唐唐噚日以署理特首身份，力撐委任冇問題，又大讚發叔非常重要，天上有地下無，皆因未來好多基建項目，都要同原居民、鄉事派人士打好關係，發叔可以發揮重要角色，為施政帶來方便。唔少政圈中人聽到，即刻笑到碌地。
熊貓搞掂國寶政策
唐唐講到，廣深港高速鐵路、蓮塘口岸、港珠澳大橋，全部都同新界有關。意思即係，就算阿爺同對口單位點晒頭都唔夠，冇發叔幫口一樣搞唔成。職工盟李卓人就話，如果咁講得通，政府其實唔應該委任發叔，根據政府一直以嚟嘅講法，推動基建最大阻力唔係鄉議局，而係環保人士，所以唐唐咁講，好明顯只係推搪，總之絕口不提政治交易。
用番唐唐嘅思考邏輯，以八方計，行會只要再搵多幾個成員，擔保煲呔乜彈都拆得掂。首先委任嘅係海洋公園嘅大熊貓，國寶來港吓吓出事，先唔好講安安早前咬咗工作人員一啖，大單嘅當然係十條中華鱘出現三死兩病慘劇，雖然剩番嘅中華鱘執番條命返福建過年，但過幾個月都係要住番喺香港，為咗排住隊嚟嘅娃娃魚、小熊貓同揚子鱷，全部都係國寶級生物，委任最熟悉國寶需要仲識得保命嘅大熊貓入行會，國寶政策一定唔會出事。
國寶同人命同樣重要，食物安全問題隔一陣就出現報章頭條，呢個問題重要性絕對唔差得過收地搞基建，咁嘅話，行會應該搵埋識煮識食嘅蘇施黃入去。民間智慧話，由鹹菜頭到鮑魚都識得揀嘅人，判斷力一定唔錯，加上阿蘇鬧人有一手，搵佢去立法會接蕉肯定有助提高政府威信。
藝人推銷方便施政
雖然煲呔話明所有棘手問題會暫時放低唔搞住，醫療改革係其一，但有合適人選，難題亦變成noproblem，搵邊個？程至美啦。未來戰士阿諾可以做到加州州長，咁吳啓華飾演嘅腦科醫生咁深入民心，由佢向普羅市民推銷醫療融資方案，點都好過周一嶽頂住個大肚腩去踢波拍廣告啩。