話咁快就到年初七，未結婚嘅波友雖則有利是𢭃，但經濟咁差，都係留多幾個錢傍身好過，喺度勸大家繼續刀仔鋸大樹。今期重點推介，要利物浦大戰車路士和波收場，3.1倍D係正常賠率，博更高分頭，取「主/和」或「客/和」。
利物浦近期走勢冇季初咁勁係事實，嗰邊車路士話就話4連勝，但只要睇吓對手係史篤城、葉士域治、修安聯同米杜士堡之流，級數點同利物浦比，講真兩隊都冇贏波把握。睇番紅軍對上4場全和之餘，近3場唔係領先緊被迫和，就係落後緊迫和番對手；呢場波「主/和」或「客/和」都有16倍，唔怕買足兩瓣「半全場」。
博洛尼亞單W抵買
意甲嗰邊都有場波好抵買，主隊博洛尼亞個W有成3.05倍，今場迎擊費倫天拿絕對有得打。事關博洛尼亞啱啱簽入嘅奧斯華度絕對係件好嘢，處子登場即刻倒戈費倫，唔使講肯定對前球會還以顏色；唔好唔記得博軍仲有廸華奧呢位當勇射手，佢𠵱家入咗15球，喺意甲暫排射手榜首位，主場之利加上單W逾3倍，真係好抵博，記住買埋6.5倍「主/和」。
最後一關，揀咗葡超拿華作客贏馬里廸莫，4.5倍W可以一試。馬里廸莫近期攻力唔算標青，上季主場都輸過0:1畀拿華；至於拿華勝在攻力唔錯，上場葡盃雖然輸3:5畀費利拿，但都叫做入咗3粒，贏馬里廸莫唔奇㗎！文：畢傑