家陣啲手提電話功能真係多到不得了，影相、上網、打機已經係基本功能唔少得，市面好多智能手機仲有埋可以執行Word、Excel、Powerpoint等文件檔案嘅程式，甚至支援AGPS全球定位輔助系統，去到邊都唔怕蕩失路，同帶部電腦出街無乜分別。
小妹早排都唔執輸出咗部智能手機，但因為未熟悉部電話嘅運作，唔覺意上咗月費計劃唔包嘅網站，搞到要畀多成100蚊電話費，見到張單嗰吓都幾肉赤。不過，今次真係要讚吓啲電訊公司，因為我用部新機上咗要收費嘅網站後，佢哋就即刻send個網絡數據用量提示短訊畀我，提醒我數據使用量已經超晒額，之後仲有職員打畀我，問清楚我發生乜事，點解無啦啦會上多咗咁多網站。
職員仲好細心咁教我點樣用部手提電話查閱上網紀錄，又提醒我唔好將同上網有關嘅程式設定成電話捷徑或者喺主要程式頁面度，以免唔小心㩒到啲掣唔覺意就上咗好多網，到時張電話賬單就唔只畀多100蚊咁少，分分鐘過千都得。個職員又話，𠵱家電話公司會不時留意客人各方面嘅數據使用量會唔會出現異常，有嘅話就會盡快提醒用戶。
記得之前唔少人投訴電訊公司冇提醒用戶有關上網、短訊同通話使用量，令好多人唔覺意用咗要收費嘅服務，唔小心就跌咗入收費陷阱，𠵱家有咁體貼嘅服務真係非常抵讚！
電郵：mailto:[email protected]
逢周六、周日刊出