一提起深水埗，各位brother都應該諗起電腦，尤其係深水埗電腦節上次45萬人次入場咁墟冚，好多人都喺嗰度掃咗唔少LCD電視、機頂盒、手提電腦啦，總營業額有成2.3億元，破晒紀錄。但聽講就係因為太多人，大會收到大約30幾個嚟自附近居民嘅投訴，話逼到佢哋返唔到屋企喎。
前幾晚小藍去一個宴會撞到電腦商會主席梁定球，佢話已經諗緊改善辦法，包括將部份通道劃分為行人道同展覽通道，「其實上次有啲街都係咁做，效果幾好」。不過佢話已經向居民發問卷，好快會收番嚟研究。
今年票價不變
梁定球話商會一年搞兩次展覽，另一個係8月喺會展搞嘅電腦通訊節，上年雖遇上9號風球，都有51.5萬人次入場，營業額達2.1億元。佢同小藍講，今年展期已定喺8月21至24日，展位由600個增至逾900個，雖然場租各樣貴咗一成，仍決定今年票價不變。佢話今次會有成四至五十個廠商參與，佢哋賣嘅電腦、AV產品隨時更低價，應該吸引唔少精明嘅消費者。
早前有外國客戶因為撻定，令本地商戶廠家急於喺展覽割價散貨，我哋先執到啲平貨。不過梁定球話，最近佢哋已經按市場需要調低貨量，估計電腦電子產品價格好快止跌回升。
4月或有展覽
不過咁，佢都話因為展覽反應好，諗緊會唔會喺4月搞多次，但就話場地好難搵，目前都只係一個構思。
逢周六刊出