今年係六四20周年，但仍然有唔少離開咗中國嘅民運人士，一直過住流亡生活。當年曾經協助民運人士嘅朱耀明牧師，發起「我要回家」運動，爭取中央政府准許民運人士重返國土，行動之一係走訪民運人士，講番六四事件同逃亡感受，並輯錄成書《我要回家》。
兩年嚟熱心人士去過英國、法國、丹麥、瑞典同芬蘭等，訪問咗43名民運人士。書中有不少鮮為人知嘅六四事件經過同流亡人士遭遇，例如當年北京嘅學生糾察隊總指揮張健喺六四屠城當晚中槍，子彈碎片至今仍留在體內。「希望國際人士關注，亦希望中國政府明白，有一班國民好想返去佢哋國土。」朱牧師話，希望民運人士可以回國，亦希望新一代中國人可以透過呢本書認識六四。