市場詬病已久的所謂「勁假」（競價）時段又再搞鬼！昨日不少股份如長實（001）、和黃（013）、交行（3328）、國壽（2628）等都在該時段出現異動，另外中行（3988）更出現100「球」交易盤連環「U」幾次，仲高收2.07元！呢類大場面不知幾好睇。港股昨成交441億元，其中有一成係盤後「勁假」時段交易。
散戶見狀，滿腹疑團，礙於在投資市場上角色被動，一味得個「估」字。事實上，恒指服務公司下個月13日將進行季度檢討，即係話藍籌股組合有機會出現變動，但時間距今尚有半個月，幕後大戶無理由咁快做嘢啩？
一舉突破50日線
由於聯通（762）與網通合併後，藍籌股由43隻減少至42隻，市傳獲「染藍」的新貴係華潤電力（836）。華潤電力昨一舉突破50日線，上升4.2%，報14.50元。雖然華潤電力升勢未及華能（902）及大唐發電（991），不過，該股有染藍憧憬，相信在季度檢討公佈前仍會惹來市場追捧，表現有機會後發先至，短線目標17元，以13.60元止蝕。
工商東亞發表報告，指華潤電力市值在主板中排第28位，較目前藍籌股中16個成員為大，加上又暫未有內地電力股代表，故認為華潤電力「染藍」機會高唱入雲。
方星俠