牛年個市連升兩日，總算有好開始，但後市係點相信冇人會估到，可能再次大起大跌都未定。講開冇人估到，點可能唔提德甲升班馬賀芬咸，季前肯定冇人估到佢哋可以壓過拜仁做冬季「1哥」，兼且喺上半季開埋啲超大比數波膽，禮拜六佢哋迎戰科特布斯，就博一博要個3:3。
博和科特布斯3:3
賀芬咸排第1（未計禮拜五漢堡對拜仁嘅賽果），科特布斯就係倒數第3兼要作客，點可能唔輸呀？科特布斯喺之前5場友賽同對利華古遜場德盃，場場都有入波，而且，賀芬咸班波係攻力勁，但防守似乎麻麻，所以佢哋係有機會入波，相信亦會失波。賀咸芬有射手伊比斯域長「唞」同埋中場卡路士伊度亞度停賽，不過好彩其他球員如丹巴巴亞同沙利荷域都入到波，呢場就博一次要3:3。
另一場德甲漢諾威主場對史浩克04，史浩克陣中有韋斯達文、保頓同法芬等球星，講牌面真係贏晒，但喺今季聯賽佢哋都幾多和波，有成6場，加上漢諾威唔係想像中咁差，好似泰勒同漢基等有入波能力，就博佢哋兩隊開2:2握手言和。
英超方面，維拉雖則冇咗艾舒利楊格，但新簽前鋒希斯基火速融入球隊，又有巴利、艾邦拉荷、占士米拿同埋柏杜夫等撐場，對住作客差兼陣容變動大嘅韋根，有權大勝一場，信喺早飛推介維拉嘅畢傑，要佢哋贏4:1。
文：青蛙仔