由美國Rap歌紅到嚟香港嘅MCJin歐陽靖，早排曾經話過唔知特首曾蔭權係一個人，抑或係一個職位，成為政圈笑料。MCJin最近上去鄭經翰嘅節目做訪問，被問到點解會認為曾蔭權係一個職位時，佢話自己廣東話只係半桶水，當日聽錯曾蔭權係「真有權」，仲即時耍冧"Mr.DonaldTsang,I'msosorry!"
經過惡補之後，MCJin𠵱家除咗知道曾蔭權洋名Donald之外，仲知道佢好鍾意打煲呔。同煲呔老友鬼鬼嘅大班見MCJin咁識做，送咗隻《劉三姐》CD畀佢，話Rap歌其實好似中國人唱山歌，叫佢好好參詳。八方提提MCJin，如果Rap歌唱到山歌咁，以後想攞獎都難，千祈唔好中計。