好嘔心！華府出手拯救金融業嘅同時，華爾街高層夠膽死合共領取百幾億美元花紅，識玩數字嘅人似乎真係大晒，不過我又信唔知足，做衰嘢嘅人總會有天收。我哋唔做醜陋嘢，常知足，小注怡情睇波已經夠開心。今次同德甲癡青蛙仔合力推介冷盤，希望令大家開開心心。
今日好多人都睇中阿積士炒海倫芬，筆者都唔例外，但就對於阿積士由頭贏到尾有保留；睇隊波歇冬後表現幾慢熱，就算睇全季，半場贏唔到甚至落後嘅個案都唔少，相反客軍歇冬後3場實戰全勝，而且都係有頭威嗰隻，打道氣，半場真係未必輸實，但全場就難免一敗，可吼和/主。
吼史高斯得「首」
英超方面，扒冷可睇實場《雙「城」奇謀》，各出奇謀。曼城最近好似好勁，但全部主場比賽，今次作客史篤城難逞威風。總覺得曼城隊波太多唔明朗，仲有打死唔信羅賓奴唔受單官司影響，史篤城有得贏，而且應該係由頭贏到尾。
曼聯對愛華頓，我貼曼聯球員入「首球」點算冷？梗算，因為我揀有15倍嘅史高斯。純粹直覺，呢類老牌球會交鋒氣氛好熾熱，往往就要靠資深老兵數糊，如果史高斯踢正選，邊個敢睇死佢唔識數糊？如果踢後備，等退款囉。
文：藍鑽石