鍾意車嘅都有留意即將上演嘅超大型汽車特技大滙演，引用英國電視節目而命名為TopGearLive，相信睇開節目嘅朋友都知主持JeremyClarkson、RichardHammond說話尖酸刻薄又爆笑，今次世界巡迴表演尾站係由ShellV能量無鉛汽油冠名贊助嘅香港，兩人仲會連同香港車手Marchy李英健一齊出騷，有幸同兩位搞鬼主持做訪問，真係開心到震！
記者：梁美甜
照片提供：Shell、TopGearLive
寧落Pub都唔綵排
TopGearLive汽車特技大滙演可以話喺香港史無前例，一部部真車，仲要係Supercar駛上台狂舞。問到兩位喺呢次巡迴表現，究竟整爛咗幾多部車，Jeremy話：「好明顯，我會答一架都無啦！」Richard就坦白得多：「大部份都整爛晒！」Jeremy仲要抵死咁加多一句：「我哋玩現場㗎嘛，乜都可能發生！」咁即係話撞爛揩花係少不免喇！做表演梗有練習又或者Rehearsal㗎？「Practice？」有睇過其他地方表演嘅應該識答Richard跟住個問題，「我哋似有練過咩？」言下之意即係無喇，明白！似乎言猶未盡，Richard仲話唔想過份打磨同修飾咪唔綵排囉，有時間寧落Pub飲番杯喎！
GradeA好騷
電視節目入面就有3位主持，另一位James點解唔嚟香港呢？今次反而係Richard有口德，只係話James太忙、玩得太勁，消化系統唔適合長途飛行；Jeremy就話：「James可能唔係咁鍾意出國。咁仲好，同本地（香港）人合作一定無同James咁悶！」咁都得！話晒同James合作咗咁多年，貿貿然轉拍檔，合作得來嗎？「仲好，有本地人同觀眾繙譯，用番大家明白嘅俚語同笑話咪仲易明，對我嚟講，佢（Marchy）仲肩負重要嘅外交角色㖭！」Richard突然認真地答，而Jeremy就一貫幽默作風：「Marchy係賽車手，我講說話當然要慢啲同清楚啲，等佢（賽住車）都明白到我講啲咩。話晒係巡迴尾站，有無咩驚喜畀香港觀眾先？「……咁一定會係……」出乎意料地異口同聲，不過Jeremy就留咗少少空間畀大家想像：「……你估我唔到㗎啦……」換個角度，有咩場口係唔可以錯過呢？Richard：「場場一樣……或者留意吓我同Jeremy揸車時會唔會有咩撞花撞爛囉！」Jeremy：「有武裝直升機上場勁唔勁，仲有諗唔到嘅特技同比試，又有成億超跑上場，成群舞蹈員又有爆炸場口……」夠！咁由A至F，你哋會畀幾多分？Richard斬釘截鐵話係AGrade，而Jeremy仲要幽多一默：「場表演好出色而Richard就好垃圾，幸好我同Marchy在，幫一幫佢喇！」笑到肚痛！
