教育學院校長張炳良同一眾副校長噚日喺教院同記者團拜兼茶敍。雖然教資會係咪贊成教院正名嘅報告仲未出，但已有風聲話報告唔多正面，張校長噚日就話冇有怕，總之會同政府講數，對升格做師範大學保持樂觀。佢仲話，未來教院將會盡力搞好大學三三四改革，教院到時就採用五年制，𠵱家已經要努力招兵買馬。
轉制在即，大學高層音樂椅玩個不停。舊年8月先至由理大醫療及社會科學院院長一職，跳槽去教育學院做講座教授嘅汪國成，唔夠半年，又傳佢蟬過別枝消息，準確啲講，應該係吃回頭草。
八方聽聞，理大校董會近日開會，想邀請汪國成回巢做副校長，一來佢熟悉理大，而且同師生關係幾好。理大學生會有人同八方講，歡迎汪教授重投理大。至於汪教授意向如何，佢話暫時冇嘢講得，皆因由大埔轉去紅磡教書，有好多問題要考慮，呢一刻未有決定。
轉工跳槽，無非想升職加工人，只要呢兩個問題傾掂，八方相信好易有決定。近排大學出現唔少人事變動，三三四係原因之一，亦同各院校高層紛紛夠鐘退休有關。