劉皇發議員以新界鄉議局主席身份，於車公正誕（年初二）到車公廟為香港求籤，求得第二十七籤（下籤），大眾嘩然。劉主席對記者講：「車公大元帥係好靈㗎！」前民政事務局局長何志平在二○○三年年初二求得下籤，佢雖然係基督徒，亦慨嘆「車公有時都幾中肯」；香港民間智慧信車公，左丁山每年新春都拜車公，感覺有如何志平，「車公有時都幾中肯」，起碼自己事業當衰之年，就畀抽到之車公下籤講中。
二十七下籤云：「君不須防人不肖，眼前鬼卒皆為妖，秦王徒把長城築，禍去禍來因自招」。解曰內有家鬼，自身不安；家宅不吉，求財不遂，果真衰到貼地，最弊沙田鄉事委員會委員蔡根培陪劉皇發求籤，佢自己亦為沙田區求咗一支六十二號下籤：「聞道他鄉風景好，爭名奪利逞英豪，只防路遠波濤急，馬倦人勞枉自勞」，凡事不吉。相較之下，六十二籤冇咁差，因為只要知道車公示警，不往他鄉逞英豪，安分守己嘅話，自然冇事。但二十七籤顯示「眼前鬼卒皆為妖」，即係小人太多，令人防不勝防，隨時中招。
劉議員新近加入行政會議，身價倍增，但是非隨至，畀民主派告上廉署，雖然難以告得入，但未免有「禍去禍來因自招」之譏。自由黨高層解籤，見到「內有家鬼」，好難唔會心微笑，泛民主派解籤，見「君不須防人不肖」，大可指「君」為「曾」，講吓政府內部一團糟。最心水清嘅係《南華早報》，居然挖出舊料，指劉皇發在一九九二年求到二十七號下籤，與今年相同。一九九二年發生乜嘢事？彭定康來香港就任最後一任總督，當年（猴年）曾有蘭桂坊慘劇（二十一人死亡）。彭定康來港後，就開展咗一場政治改革鬥爭，搞到後來周南與魯平拍枱拍櫈，大罵彭定康係千古罪人，回想起來，香港人爭取民主，港英政府從來潑冷水，彭定康先至係第一個明確支持民主選舉嘅，在魯平眼中，當時彭定康就係「眼前鬼卒皆為妖！」𠵱家香港回歸已久，誰人會再度挑起政治紛爭？唔通會係二○一二年政改方案或者係二十三條立法？曾特首係天主教徒，信唔信邪呀？