牛年剛到，馬上患上拜年症候群，一枱油角煎堆，咁多油膩嘢真係食到牛咁眼。不過計我話，致命傷一定係親友嘅熱情蘿蔔糕，食完個胃馬上滯。想消滯，降脂提神，一杯中國茶有齊上述功能。邊個話年輕人唔飲茶，品茗咁多好處，就連HotCha都喝茶。
記者：王震遠
攝影：譚盈傑
Wardrobe：RoseBullet
冲茶
茶莊經理楊先生教路，HotCha親自示範。此冲茶法適用於烏龍和普洱，同樣以高溫水來泡茶。
投茶
將茶葉放進茶壺中，數量將近四分一，就可注入熱水，並先洗一次茶。
焗茶
在茶壺上灑上熱水，焗25至35秒，令壺內提高溫度，令茶味更清香。
分茶
焗茶後將茶倒在公道壺內，便可向茶杯分茶，此舉令每杯茶可保持相同的味道。
HotCha講茶經
去年尾剛完成演唱會的HotCha，前排又忙於灌錄剛推出的新唱片，雖然年輕，也捱得身體變差，實在教小記於心不忍。這次帶她們去喝茶，一來為消滯，二來尋求養生之道。本以為後生女對茶一無所知，豈知三人對茶也有少許認識，這次試茶，更喚起她們對飲茶的興趣，話想身體更好皮膚更美，保持更佳狀態見粉絲。
Winkie愛透天香提神
Winkie前陣子常飲茶，不過是在cafe。「在cafe飲過一種茶好特別，叫蜂蜜綠茶，可以親自撈蜂蜜落去。有綠茶，又有薰衣草茶。雖然唔算係正式飲茶。」正式品茗，則要數她跟媽媽在家中冲茶，「媽咪最愛飲普洱，喺屋企都有冲，啱啱嚟呢度見到焗茶個step先省起，喺屋企見媽咪做過。近排好少冲，但聽楊先生講，飲茶對身體好啲，之後會飲多啲。」
透天香
每位$30、2両$70
青茶類，烏龍茶的一種。帶桂花香味，有幫助消化和醒腦提神之效。
Regen愛玫瑰花茶消脂
Regen原來不只愛飲茶，還親身見識過摘茶。「細細個跟屋企人去旅行，好似係浙江，嗰度係鄉村地方，即場示範摘茶同炒茶。（係咪茶是故鄉濃咁呀？）真係好似係電視劇播緊嗰排去。」自從此次體驗，她屋企人就買了茶具，自家泡茶來喝。「爸爸好鍾意飲人參烏龍，入口味道甘甘哋，細個好鍾意飲。」Regen還以為日本的綠茶才健康，其實飲中國茶，也一樣很健康的。
玫瑰花
每位$30、2両$50
花茶類，女士最愛其芳香花味，有美容消脂和鬆弛神經作用。
Crystal愛政和白牡丹滋潤
採訪當日，Crystal是飲得最多那位，她當日喉嚨有點痛，楊先生便推介她喝有滋潤功效的政和白牡丹，「啱啱飲唔覺得味道特別，不過慢慢，味道好清，我信真係可以潤喉。」Crystal平時最愛飲入口甘香的烏龍茶，但她自言不懂茶道：「細個時飲咗都唔知係咩，今日試完，單靠味道亦未識分，但都講得出飲完有咩感覺同味道。」飲多啲就識㗎啦。
政和白牡丹
每位$30、2両$50
白茶類，香味清甜且鮮爽，可滋潤喉嚨，亦可清暑熱。
32樓的品茶"cafe"
要品茗，不是到茶樓，茶樓的茶葉大都不是靚貨色。想真正試試中國茶道，要到茶莊。新星茶莊在高樓大廈的32樓，大型玻璃窗，飽覽維港海景，未喝茶心境先平靜。這裏有專櫃陳列了比我年紀還大的陳年普洱茶餅，楊先生說，這些普洱茶餅就像紅酒，存放越久，味道越好，是高級貨色。這裏還可讓茶友自助泡茶，按茶種收費，最低消費每位$30。就像樓上cafe，有不少茶友會到此「茶」聚。想了解茶道，可向員工請教，甚至參加這裏的品茶班。
南糯白毫
每位$30、2両$60
綠茶類，味道偏清甜帶蜜香，能消暑解渴和降膽固醇。
普洱熟餅
每位$30、4両$100
黑茶類，味道醇滑潤喉，茶性較溫和，能暖胃去油膩。
新星茶莊（28322889）
銅鑼灣羅素街38號金朝陽中心32樓3201室
註：初八啟市
