每個人都可能有一些「死穴」，感情事也許是舒淇的最大死穴，過去的感情經歷令她受了不少傷害。還記得04年她與黎明分手後，去了台灣演出侯孝賢的《最好的時光》，她演的藝伎被扮演文人雅士的張震拋棄。拍攝這場戲時，舒淇情緒崩潰，失控得痛哭了近20分鐘，嚇得張震連忙安慰她說：「不是真的！」這段情緒低落日子，足足維持了一年。 撰文：陳月媚
舒淇當年少不更事，16歲在台灣離家出走，之後為生活拍了不少裸露寫真和光碟，直至19歲，文雋帶她來港拍了不少三級片，成名後她花了不少時間洗底，由花瓶到今日成為影后，演技備受肯定，最近她擔演的《非誠勿擾》在內地上映更收過3億人民幣，身價不可同日而語。
「以前係為生活」
回望過去，問舒淇會否後悔以前走過的路？她淡然笑說：「咁又冇，咪當係一種經歷，𠵱家做訪問，周不時都會俾人問起過去嘅事，我唔會逃避，因為每個人都會有過去，咁以前係為生活，又唔係咁識諗都冇辦法，但我好開心喺呢個圈發展，可以有機會俾我轉型，可以拍到唔同類型嘅戲種，而且可北上轉走實力派，真係好難得。」
在《非》片中，舒淇愛上有婦之夫，但最後她選擇離開，問她在現實生活中，若發生同樣事情，會否真的願意放手？她說：「其實我係一個愛情大過天嘅人，所以好多時會因為感情用事受到傷害，如果我不幸愛上一個已婚男子，咁就要睇吓事前我知唔知啦！如果後來先知道，我未必會放手，但一早知道，明知再發展落去都未必有結果，咁樣我可能會盡快放手，以前我曾經歷過幾段感情，最終沒有好結果，而且都傷得幾重同痛苦。」
舒淇指自己不容易去深愛一個男人，一旦愛上了就不易放手，除非這個男人對她不忠，這是她的底線。舒淇拍拖不算太多，令人最深刻自然是她與黎明的一段緋聞，不過這段情，據知已在04年結束，剛巧侯孝賢找她去台灣演出《最好的時光》，當她扮演藝伎被文人（張震飾）嫌棄的戲份時，她竟然情緒失控，哭得不能停止，導演與張震當場嚇呆，舒淇憶述說：「呢個時候我係好唔開心，睇嘢好灰，好小事就可以令我喊，嗰日拍呢場戲時，我喊咗成20分鐘，張震走過嚟拍拍我膊頭話：『這不是真的！』但我根本控制唔到自己嘅眼淚，呢場戲最後都拍唔到，導演要嗌收工。」
舒淇這段痛苦的日子，足足維持了一年，直到她演出《怪物》這部戲，始熬過這段日子，她說：「我都唔知點解，可能因為喺呢部戲入面，我個角色幾歇斯底里，成日都要好大聲咁嗌，嗌吓嗌吓，個心嘅鬱結釋放晒出嚟，人就開始變得平靜落嚟，而且我仲變得堅強同獨立咗！」
「咪等緣份到囉」
如今舒淇雖然在感情方面交白卷，但事業方面比以前充實了，所以她並不心急要找對象，她說：「感情嘅事，根本急唔嚟，咪等緣份到囉！其實喺演戲方面越嚟越有成績，我都好滿足同開心啦！拍完馮小剛，又可以同劉德華合作拍劉偉強嘅《游龍戲鳳》，部戲喺內地同香港都收得唔錯，真係要多謝老闆林建岳畀咁多機會我，如果將來可以拍到一部類似鞏俐演嘅《漂亮媽媽》嘅戲，我就會好滿足啦！𠵱家我對做戲越嚟越喜歡，相信我會以拍戲做終身職業！」
海嘯冲走千萬身家
去年金融海嘯不少藝人都輸大錢，想不到理財十分穩陣的舒淇一樣大損手，輸了過千萬港元，她說：「唉，我理財都好保守，我喺台灣買咗兩間屋，其餘錢都係投資基金，我以為好穩陣，我真係連股票都唔會買，點知一個金融海嘯，我個投資顧問同我講，話蝕剩兩成咋，你話聽到係咪好肉痛呀，啲錢咁辛苦搵番嚟！
「好彩仲後生，我相信會搵得番嚟！不過我對投資基金有戒心，以後啲錢唔會再放喺基金度啦，點知幾時又嚟多一個金融風暴呀！」
考慮在港置業
舒淇在台北的兩間屋，一間自住，一間是買來給媽咪的，但她在港卻沒有置業，她解釋說：「香港樓價太貴，我一直覺得唔抵，所以始終冇買到，好多人話今年樓價可能會下調，睇吓到時點啦！如果真係好抵，自己手頭上又夠錢，都可以諗吓嘅！」