一踏入牛年，亞視就得到台灣富商蔡衍明入股泵水打救，真係逆市行運，相信對高層同員工嚟講，係一封睇到都笑嘅新年利是。亞視執行主席青樓張噚日現身即刻有新搞作，誓言要將亞視大革新，又提出「三新」思維，即係新定位、新水平同新文化。大家以為係個好開始之際，青樓張竟然烏鴉口，話亞視如果再經營不善就遲早摺埋，新年流流咁大吉利是，就算着到一身財神look都唔慌受歡迎啦，啋！
「唔好以為唔會執笠」
香港電台噚日舉行新春團拜，本地電子傳媒高層都畀面出席，無記有志雲大師，亞記就有青樓張。不過身為城市電訊執行董事、喺亞視做咗12日行政總裁嘅魔童王維基就冇現身。團拜嗰陣又舞龍又舞獅，喜氣洋洋。對於新正頭就有台灣資金出手幫亞視止血，青樓張當然非常歡迎。接住仲話一直都好唔滿意香港電視台嘅水準，所以決定由3月開始，將亞視節目進行小改革，到10月就大改，希望可以搶到收視咁話。
有傳青樓張會喺亞視粉墨登場開show，諗住憑佢一支公一星期齋噏六日，咁嘅安排如果播得出街又有人睇嘅話，同對手台次次都要搵明星同美食撐場嘅《志雲飯局》一比，至少贏一條街。對於咁高章嘅諗法，青樓張話仲未揸定主意喎，越講越興奮，佢唔覺意講咗幾句唔老利說話，話呢次係亞視最後一個機會，如果再經營不善，後果只有一個，「啲錢唔會繼續咁嚟㗎，唔好以為亞視唔會執笠呀！」憑佢噚日咁嘅表現，大家對青樓張唔知開唔開得成嘅齋噏show，都唔好有乜幻想嘞。
mailto:[email protected]