新年最開心嘅事，莫過於一家大細歡聚一堂。立法會秘書長吳文華（Pauline）相信都會同對孫仔孫女歡度牛年。同好多嫲嫲一樣，Pauline無時無刻都掛住佢對寶貝孫；Pauline個仔Anthony睇穿媽媽嘅心思，日前忽然送咗份新年禮物畀阿媽。
Pauline一睇禮物盒個size，估計都係年曆之類嘅例牌嘢，但打開之後令佢開心到想大嗌，原來年曆由阿仔一家四口玉照組成，而且仲喺啲特別日子例如Pauline五月生日嗰格印上佢個樣，非常有心思，全年望住每日都sweetsweet。呢份自家年曆叫做「4A年曆」，因為除咗阿仔Anthony之外，新抱Anna、孫仔Alistair同孫女Amelie英文名都係A字頭。