新一年，孫柏文祝大家身體健康，咩市況都身手敏捷。《金手指》對上幾個禮拜小休，我用咗放假時間，去檢討金融分析同預測嘅方法同提高準確性，但點都諗唔到。
試問今時今日，仲有咩人會信啲財經專家、分析員嘅預測？幾日前辭職，被譽為「08華爾街最準策略師」，大摩嘅AbhijitChakrabortti，預測08年收市點數都錯成621點。大家可能會話：「淨係錯621點，好勁囉！」最弊佢測嘅係標普500指數呢！咁就係華爾街最準囉！
直至年初二檢討先有突破。睇電視話鄉議局主席劉皇發代表特區求籤，我作為市區人唔知點解佢會代表我。其實「求籤代表」最好普選，我一定投畀年廿八贏六合彩嘅頭獎朋友，明知勢弱就要搵個手風勁嘅。
下籤的啓示
大家都知劉皇發求咗下籤。支籤講乜我就唔知，因為我好似啲散戶睇大行報告一樣，唔睇內容，淨睇評級。不過呢支下籤，就令我覺得仲有希望。當標普、穆廸啲AAA信貸評級冇晒公信力，下籤都仲係下籤。有咁結論，我仲唔係強勢回歸！
孫柏文
http://phatdat.blogspot.com