政府會唔會再派糖利民紓困，2月底就揭盅，但牛年點都要攞個意頭，財經事務及庫務局局長陳家強（KC）噚朝去金銀業貿易場主持開市儀式之前，破天荒同廿幾位行家飲早茶。佢話平時嘅記招都滾水淥腳，一於年初四朝早嘆盅蝦餃燒賣梳乎吓。咁都啱嘅，皆因局長在公在私，嚟緊都有排忙。
磨定刀接議員招
先講家事，KC兩位公子分別十八廿二，都係芝加哥大學經濟系高材生，呢間名校不嬲係自由學派嘅橋頭堡，有已故諾貝爾經濟學獎得主佛利民坐鎮，可惜𠵱家唔興呢套，大仔就快畢業，雖然有北京留學經驗，但局長話喺華爾街搵工唔使諗，勸阿仔邊度有工就返。
公事就更加閉翳，雷曼迷債聆訊立法會2月20日開審，局長過年都要「度」定官方聲明，費事到時失威。2月25日又要公佈預算案。3月初再到澳洲考察，為引入「雙峰模式」（TwinPeaksSystem）嘅監管機制取經。行程咁緊密，局長過年主要留喺香港煲碟，得年初二約老友返順德兩日一夜打高球。
李華華
mailto:[email protected]