東亞運動會年底開鑼，雖然特區政府已經好努力為運動會撲水，但八方最怕佢哋到頭來都係白費心機，事關家陣問十個市民，九個都未必知道原來有個名為東亞運動會嘅大型盛事會舉行。公民黨陳淑莊Tanya都替政府擔心，因為佢啱啱訪問咗近千個市民，發現高達三成半被訪者都唔知香港會搞東亞運動會，Tanya話睇到結果都標晒冷汗。而喺知道會搞東亞運動會嘅受訪者中，高達四成人話唔滿意、甚至非常不滿政府嘅籌備工作。
Tanya覺得市民唔係冇興趣入場觀賽，但政府宣傳嚴重不足，先令市民一頭霧水，嘥咗個推動運動嘅黃金機會；希望政府做多啲宣傳工夫，否則運動會爛尾收場就唔係咁好喇。