「作為一個警察，百無禁忌，唔會驚呢啲嘢，但係大年初四收陰司紙，真係太離譜！」住在黃大仙紀律部隊宿舍的一名姓陳警員，昨天下午又從信箱內拿到郵寄來的陰司紙；像過去一個星期一樣，信封裏有利是封，利是封內塞了兩張面額各5,000萬的陰司紙。「從舊年10月開始到𠵱家，我收咗近30封信，大大話話都有十幾億。」
火燒紙角位想咒人死
「當差」多年的陳先生說，從去年10月開始收到寄來的陰司紙，之後越來越密，從一個月一封，到一個禮拜三、四封。陰司紙的面額亦越來越大，「最初收過500蚊，之後收嗰啲係100萬，跟住係5,000萬，仲要打孖上，即係1億。」
過年前的一個星期，陳先生一連收到了四、五封塞了陰司紙的信，其中兩封在1月21和23日收到的信，裏面附載利是封，陰司紙塞進了利是封。「有啲面額100萬嘅陰司紙仲俾人用火燒過角位，我即刻去問喃嘸佬，想知道係乜意思，喃嘸佬話咁做嘅意思係想咒人死。」
陳說，住在同一座大廈的基本上全是警察家庭，「做得警察一定唔會驚呢啲嘢，但屋企有老人婦孺嘅，就會好驚好擔心，因為佢哋覺得受到威脅，唔知下一次會唔會收到更加恐怖嘅嘢。」昨天有住客收到陰司紙利是後，氣得大叫：「我實在頂唔順了，真係大吉利是，一定要再報警。」
陳先生續稱幾乎家家都受盡滋擾，「希望快啲破案，唔使搞到新年流流人心惶惶。」
本報記者