牛：恭喜發財，畢傑；新正頭咁啱有英超快車，發唔發到新年財先？
畢：正路嘅熱刺同曼聯都中到，但阿仙奴就衰咗，好彩尹佩斯完場前入番球，讓平/半輸少半格！
牛：曼聯炒到5粒，如果馬會有開走地讓球盤，肯定執到笑啦。
畢：場波我都有睇，曼聯表面上好似好輕鬆，但未入波前，都俾西布朗壓住打，尤其冇艾拉，用奧沙打左閘，呢條友慢吞吞，唔失波都算有運。
牛：曼聯今周對住愛華頓，以愛華頓連續賽和利物浦同阿仙奴氣勢，曼聯雖然主場，但唔好話大炒，贏都唔係好容易。
畢：我都覺得曼聯呢場危危哋；講開大炒，我就揀周六祖記主場可以大炒卡利亞里！
牛：嘩！祖記啱啱先輸畀烏甸喎。
畢：不過我對佢哋主場有信心，而且卡利亞里屬小島球隊，前嗰場作客大炒拉素，有睇場波都知拉素鬥志有問題，呢次卡利亞里要還啦；廸比亞路、阿馬利，放心入波啦！
牛：法甲我又有大炒心水，里昂周日主場對聖伊天，屬同區打吡戰；里昂近期狀態唔錯，取得3連勝；聖伊天後防失波失到甩晒轆，我信里昂可以大炒。
畢：既然係咁，不如整條波膽過關2串3，博呢兩關開「主其他」波膽，一人15蚊，刀仔鋸大樹，制唔制？
牛：以小博大當然贊成，等我填飛仔先。
畢：你咪咁out啦，等我用部PDA電話上網落注啦。