秉承謝家傳統影賀年相<br>婷婷心繫Lucas薑餅人侍候

秉承謝家傳統影賀年相
婷婷心繫Lucas薑餅人侍候

謝賢一家四口的賀年相,是港人的集體回憶,作為年紀最幼的成員、現投身模特兒行業的謝婷婷,對此卻沒有童年陰影。日前婷婷為本報試嚐新春賀年菜式時,笑言獨自拍賀年相,感覺十分sweet。婷婷笑言今年會派利是答謝同事,也準備了「大吉」和「大利」的薑餅人曲奇餅,給最愛的姪仔小Lucas,十分窩心。

謝婷婷07年回流香港,躋身模特兒行業,成績不俗。日前她穿起BlancdeChine中國服飾,到君悅酒店的港灣壹號試食中國賀年菜式,如黑椒蘿蔔糕炒蟹拑、桂花魚卷和煎和牛等,準備謝家六星級的賀年飯,她說:「我哋成家人都喺香港,𠵱家我係成家人嘅co-ordinator,多數做節聚會都係我安排。」

為姪仔度身做餅

婷婷今年農曆年開始派利是給同事,感覺自己大個女。問會否向父親四哥、母親狄波拉派利是時,她說:「咁又唔使,我哋之間唔講物質,平時同媽咪手拖手飲餐茶,佢已經好開心,我諗佢哋最想我哋做番細個嗰時,跪地斟茶講祝福說話。」不過對於姪仔Lucas而言,這個姑姐絕不手軟,除會給大利是外,更為Lucas度身訂做送上「大吉」及「大利」薑餅人曲奇餅應節。
四哥一家四口,曾為香港刊物拍過不少造型賀年相,今回孻女婷婷獨自任賀年相女主角,她表現得十分享受,她說:「好好玩,感覺好sweet,唔使好似平時做model時嘅惡樣。」

婷婷準備了可愛的大吉、大利薑餅人給姪仔Lucas(右圖)。

資料圖片

母女裝上陣拍照

其胞兄霆鋒曾透露小時候被迫拍賀年相的陰影,故刻意不笑作無聲抗議,婷婷即笑笑口說:「我當時太細個,都唔知乜事,媽咪叫我做咪做,加上我細個好聽話,驚俾阿媽打,佢叫我做乜咪做乜,冇question佢,有時都覺得好核突,點解會有costume?不過都幾得意,有一年同阿媽着同一款衫,一齊大爆炸頭。」

婷婷成為謝家聚會的搞手,負責四出找美食靚場,早前她就去了君悅試吃賀年菜。

不懂農曆年習俗

問婷婷兒時過新年有甚麼趣事,她透露與哥哥收利是的趣事說:「因為爹哋媽咪好多朋友,佢哋好客氣,媽咪要我哋記低邊個畀邊封利是,最慘我識唔晒人哋嘅姓氏。」婷婷透露自小在加拿大度過農曆年,對過年習俗認識不多,她說:「我都係呢幾年知新年唔可以掃地、洗頭,甚至唔冲凉,好多迷信嘢,好似細個一家人去拉斯維加斯過年,我哋買咗6對鞋,媽咪係畀錢叫個外國人幫佢買。」
採訪:RitaLeung
攝影:RickyIp
化妝:OmixB
髮型:RayChanofIlColpoGrandHyatt(君悅酒店)
服裝提供:BlancdeChine(置地廣場)
場地提供:港灣壹號(君悅酒店)