踏入牛年，敏妮最希望讀者朋友今年笑口常開。記住無論日子點樣，大家都要過，咁笑迎未來，總比緊皺眉頭嚟得舒服。
記得敏妮喺鼠年最後一篇文章講到保險嘅問題，年三十晏晝同一位啱啱去完度假嘅保險業前輩傾偈，佢提到去旅行時買保險一啲貼士。保險業前輩教敏妮點揀旅遊保險噃，當然唔可以錯過。
遇事有包機運返
市場競爭大，其實每家保險公司或者銀行嘅保險產品都大同小異，頂多都係格吓邊個平，邊個保額高。不過，前輩同敏妮講，仲有兩樣嘢可以分出旅遊保險嘅高低。
第一就係包機問題，大家印象猶新係泰國事件，令到曼谷機場停飛，澳門政府都有派包機去接番啲澳門居民返澳門，反而香港政府就慢幾拍。如果旅遊保險有包機運送嘅保障，就應該加分。包架飛機費用唔平，但試問要出動到包機嘅機會又有幾高？其實，市場上都有唔少旅遊保險提供呢個服務。
第二就係當投保人喺外地遇事要留院時，可以安排香港親人到當地。人在異鄉遇事，如果有親人喺身邊，好明顯個心都定啲，但市面上嘅旅遊保險，通常只係包將遇事嘅投保人送返香港，好少會包送遇事者嘅親人去當地。
安排親人到外地
正如前輩所講，數吓你出去旅行嘅次數，再計吓你claim旅遊保險嘅次數，就知旅遊保險呢樣產品，雖然保費唔係多，但都幾好賺，加埋上面兩項保障，可能未必令成本加大好多，但就可以睇出設計產品嘅人，係以用家角度，用心去為投保人提供保障。
溫敏妮
http://wanmanli.com/blogs/