一支下籤，成為港人近日拜年嘅熱話。無論信唔信呢種習俗都好，唔少人聽到特區今年只有下籤噩運都係唔開心居多，尤其籤文嗰句「內有家鬼」更加令人嚇破膽，究竟邊個係人邊個係鬼？身為特區福將嘅政務司司長唐唐呢個時候又要出場，笑笑口講到明就算求到上籤都唔等於「打跛腳就唔做嘢」，鼓勵市民振作，可能係怕大家一旦上籤在手就會游手好閒「條條fing」。
唐唐氣定神閒有因
從未代表特區政府求過籤嘅唐唐，噚日接受新城電台訪問時，自然被問到點睇劉皇發幫香港求到嗰支下籤？有備而來嘅唐唐氣定神閒，祝咗市民身體健康同事事順利先肯入正題。佢一開口就瞇瞇笑話可能喺新年期間嗰兩日冇乜新聞，所以大家都好關注發叔嘅求籤結果，言語間好似暗寸大家小題大做咁。
之後佢當然搬出官式回應，叫大家以平常心看待，但同時講到明，就算求到上籤都唔代表大家可以「打跛腳就唔做嘢」或者喺度「等運到」，所以鼓勵大家毋須氣餒。仲呼籲市民發揮牛嘅精神，唔係死牛一便頸或者空有一副牛脾氣，而係要默默耕耘。即係要好似隻牛咁起勢做，唔知唐唐又肯唔肯做港人嘅孺子牛呢？
唐唐氣定神閒未必無因。03年肥平喺車公廟求得下籤，當年沙士疫情有幾慘烈，大家都唔會唔記得，跟住仲出現梁錦松偷步買車搞到辭職收場，大環境雖然咁衰，但唐唐就因禍得福，接手做財爺；到前年煲呔連任特首，唐唐亦升咗做政務司司長。所以話，一樣米食百樣人，幾時有福幾時有禍，唔係一支籤可以包括得晒。
發叔手氣唔多好，唔知同佢最近衰氣纏身，同獲煲呔委入行政會議而俾人窮追猛打有冇關？換着第二個政界中人去求籤，可能下籤變上籤都未定，但八方覺得泛民飯盒會召集人何秀蘭亦未必適合擔此重任，事關佢日前見車公廟出咗支下籤，心思思又上網求籤。點知阿Cyd手氣差，一求就求咗支下下籤，比發叔嘅下籤仲衰多一錢重。既然唔係好嘢，阿Cyd睇都唔睇第幾籤就即時㩒掣delete，費事眼寃。如果去車公廟求籤都可以輸打贏要，負責求籤嘅發叔肯定安樂好多。
mailto:[email protected]