韓劇《花樣男子》前晚一集收視再挫宋承憲嘅《伊甸之東》，錄得25.8%做一哥，不過班演員就好黑仔，繼劇中F4兩位成員金賢重同金俊接力撞車後，噚日輪到飾演杉菜嘅韓國女星具慧善喺拍攝一場跳水戲時出事！佢低估咗泳池水深而「中頭獎」，額頭腫起，即刻去咗附近醫院照X光，要留院等報告出，同佢做對手戲嘅李民浩就無奈收工。