新年咩都要新，可惜我啲利是錢加加埋埋都係得幾百蚊，不過，年初四開工，想一年有個好開始，點都要有攞個意頭，各位鐵騎華弟牧羊人，一於買個新頭盔嚟個鴻運當頭啦，唔係講玩㗎，頭盔後面有個日本風賀年不倒翁加福字，又有有個「成」字兼有鯉魚圖案嘅爬雞頭盔，仲可以戴埋條龍上頭，後面架車睇到隨時停燈位派封利是畀你，唔信？嗱，當你喺倒後鏡見到有個白色頭盔白色車着住螢光衣望住你嘅時候，你就搵條雙黃線上落車，包有封寫住$320嘅利是畀你，真係財神到咩阿Sir！
文：嘴嚼爺
攝影：楊錦文
Model：Ceci@Stage
agv羅絲仔新歡FullFace約$4,000
09年款羅絲專用頭盔，夠晒鮮艷夠晒搶，唔係開辣車戴出街盞俾人笑。除咗都係全灰纖製造好輕之外，風鏡仲可以配上專用鏡紙，貼一塊就冇咁易整花個風鏡，即係等於你部iPhone貼嗰張屏幕貼。
最新流線設計OGKFullFace頭盔$3,200
OGK最新設計，具擾流功能的線條設計，令風阻減到最低，飛轉石澳可能會發覺比自己個人最佳圈速快0.0001秒。從側面睇，又真係好似哥哥生前唱《側面》時個鴨尾頭，戴住佢猶如巡行和滙演，你喜歡我嗎，嘿！
Suomy幻彩鏡FullFace頭盔$5,380
車手CAPIROSSI花，全碳纖保護性強，嘩！為乜要5千幾銀？因為用咗幻彩鏡，即係擋到太陽光睇嘢又唔會暗，仲要人哋望到會覺得好型。
福字限量版開面頭盔$1,399
日本ALFARAYSSTIR限量版本有紅黑白等顏色，背後一個和式不倒翁，賀年得嚟都夠崇日，而且圖案下面有個福字，喺香港地開電單車都真係要自求多福。玻璃纖維製造，夠輕，屬開面設計，可以加裝風鏡，最啱揸綿羊。兩邊內綿仲可以拆出嚟清潔，開面頭盔少有的方便。
Airoh孖鏡FullFace頭盔$2,300
孖鏡，即係外面一塊透明風鏡，裏頭仲有一塊可以推上收埋嘅太陽鏡，FullFace時可以孖鏡齊閂，想通爽啲就可以打開半個頭盔，呼吸新鮮空氣之餘都仲有塊太陽鏡擋風，實用之選，另有多色選擇。佢淨用太陽鏡，戰隊咁款，黃戰士，變身！
日本神龍開面頭盔$1,098
堅嘅，係日本頭盔廠OGK同龍球Crossover作品，後面條神龍好生猛，仲驚你唔知寫埋神龍兩個字喺度，火紅色真係襯晒新年氣氛。建議嘗試買七個頭盔返屋企許願，到時你屋企人見到應該會即刻變超級撒雅人。
1 AirohMonster花爬雞頭盔約$3,000
玩得越野車，唔好話俾我聽唔識Monster花。頭盔佈滿怪物爪痕圖案，最有型係內櫳好通氣網綿好似有波點咁，潮人係咪叫做「dot柄」？
2 FOX「成」字爬雞頭盔$1,880
越野名廠FOX出品，成功個成，純粹攞個意頭，即係你睇NBA班球星啲漢字紋身一樣，意思不大。不過頭盔上面圖案都好揮春Feel，有鯉魚代表年年有餘嘛。咦？仲有條龍？又成又龍？咁我戴完啲頭髮會唔會又黑又亮？「咚L！」
3 agv羅絲仔舊愛FullFace約$4,000
又係限量版，意大利agv為冠軍車手羅絲推出的限量版頭盔，全灰纖製造，攞上手真係輕到唔信，FullFace安全第一嘛。綠白紅三色，意大利國旗，等我今晚戴住嚟睇AC米蘭先，卡卡唔走真係乖仔喇。
4 SHM不銹鋼開面頭盔$2,250
睇落成個Buffulo保溫瓶，不銹鋼表面光滑，有啲OldSchool感覺，揸Chopper、英式街車都好襯。呢個都係日本SHM推出嘅限量版頭盔，咁反光，除咗落嚟仲可以當鏡照。
車迷城（23620388）
土瓜灣下鄉道5-19號A舖及一樓全層
2月3日（初九啓市）
http://www.motomartco.com