新春大吉，萬事如意！華華喺新正頭八到單工商銀行（1398）嘅料，唔係股東準備沽貨，而係工行獨資成立嘅工銀國際證券同工銀國際融資，喺金鐘太古廣場三期租咗兩層樓面，𠵱家裝修緊，暫定4月開張大吉。
工銀國際舊年中喺香港註冊成立之後，市場一直傳緊工行會放棄揸住75%股權嘅工商東亞（ICEA），但工商東亞仍然運作如常，東亞銀行（023）持有工商東亞其餘25%股權，亦冇乜點表態。
工商東亞班底過檔
原來工銀國際過去幾個月已經靜悄悄起動，𠵱家喺金鐘東昌大廈有個寫字樓。同時，喺太古廣場三期租咗兩層，裝修完就會搬過去。人手方面，聽講工銀國際基本上用番晒工商東亞嘅人，淨係工銀融資，估計都有超過20人，人強馬壯。
工銀國際暫定4月開張，咁啱得咁蹺，工行幾位上市前策略股東，即係高盛、安聯集團同美國運通，手持一半股份可以喺4月底之後沽出。唔知工銀國際趕唔趕得切開工，幫工行股東批股，順便做成第一單大生意呢？舊年底瑞銀減持中國銀行（3988），都係瑞銀負責批股之嘛。
等做策略股東批股
根據工行招股書，高盛、安聯同運通06年入股工行，每股成本只係1.22元，工行𠵱家做緊3個幾，都有好多水位賺㗎。
講番工銀國際同工商東亞，大家可能仲記得自從02年歐亞爆煲後，工商東亞身為歐亞保薦人，聲譽嚴重受損，生意麻麻。證監舊年正式向工商東亞融資同工商東亞證券罰款3800萬元，仲警告兩間公司3年內再有嚴重缺失，可能被釘牌。
喺呢個情況下，工行另行自組投行同證券公司，實在非常合理。希望大家喺新一年有新開始啦！
李華華
mailto:[email protected]