中信集團呢個月19號喺北京召開年度工作會議同埋第23次董事會，會議由董事長孔丹主持，總經理常振明做報告。唔講唔知，原來09年係中信集團而立之年（即係30歲），會上除咗總結，仲討論咗今年嘅經營計劃同工作重點。據佢哋官方資料，29個董事會成員中，當日25人列席、4人請假，按佢哋列出嘅出席者排位名單，華華數過，9個常務董事中，只有91歲嘅經叔平同埋中信泰富（267）主席榮智健缺席。
咁重要嘅年度會議榮太子都請假，唔知有啲乜嘢玄機呢？
拯救行動有後着？
中信集團舊年淨利潤逾140億元人民幣，較07年倒退12.3%。官方資料講咗表現突出嘅業務後，又提到中信泰富炒燶外滙導致巨額虧損，要集團出手打救，拯救行動（集團斥資15億美元認購中信泰富可換股債券）已經喺舊年12月24日大功告成，新聞稿內仲特登整咗句，「在妥善處理問題後，中信泰富將恢復正常運行」，你話仲會唔會有後着呢吓？