喺韓國五人組合FTIsland入面負責結他同主音嘅吳源斌，噚日透過事務所宣佈離隊唔玩，原因係未能同隊友喺音樂方面達成共識。FTIsland喺07年出道，一直深受fans嘅愛戴，所以fans對於偶像突然作出咁嘅決定都好震驚，懷疑佢離開係因為俾其他隊友欺負，事務所否認呢個傳聞，話會搵人頂替吳源斌嘅位置，仲會喺下月中出新碟時公開亮相。