無綫藝員部揸fit人樂易玲日前趁新春，與胡楓、梁舜燕、余慕蓮和羅樂林等11位年過半百的資深藝員舉行千歲宴。剛重返娘家的余慕蓮當日以香橙look出席，搶盡風頭。搞笑的劉丹更建議開拍《神鵰後傳》，由胡楓與余慕蓮飾演楊過與小龍女。
當日應無綫製作資源總監樂易玲邀請到中環三希樓嘆川粵菜賀年者，包括昔日電影當紅小生花旦胡楓（修哥）、雪妮和白茵、第一代電視主持梁舜燕、佳視《射鵰英雄傳》第一代郭靖的白彪和佳視《神鵰俠侶》第一代楊過的羅樂林，再加上劉丹、韓馬利、盧宛茵、于洋和剛重返娘家的余慕蓮，位位從演超過30年。
全場舉杯賀回歸
由甘草做到變成主角（去年《向世界出發》）的余慕蓮，年前曾表示不滿無綫一年一騷合約制而離巢，當日飯局她卻自爆另有因由：「我一直恨做戲，但後來冇乜嘢做，成日叫我做啲行行企企冇對白嘅角色，心諗：『唔通公司想唔要我？』既然係咁，不如我自己走先，𠵱家公司要我返嚟，我真係好開心。」說罷全場舉杯歡迎余慕蓮回歸，劉丹隨即建議無綫開拍《神鵰後傳》，由修哥與余慕蓮飾演楊過與小龍女，肯定大收旺場。
一眾資深藝員難得聚首一堂，少不免想當年一番，韓馬利大爆當年在阿姐汪明荃主演的《京華春夢》中演奸角，結果被阿姐fans群起杯葛，她說：「我哋嗰個年代做奸角觀眾一定憎你，嗰陣好多阿姐影迷寫信鬧我，要我當眾向阿姐道歉！」劉丹亦因演奸角而有深刻體會，他說：「我喺佳視《追虎擒龍》演跛豪，有好多社團兄弟話要請我食飯，有次我喺時鐘酒店開工，有社團大家姐仲帶埋大班手下嚟捧場。」
採訪：戴彩煥
攝影：陳順禎
協力：何慧斯
場地提供：滿江紅三希樓