新年流流，賭博氣氛特別旺盛，大年初三賀歲馬，必然係每年投注額最高日子。掏得腰包玩兩手，邊個想空手而回，想發新年財帶旺全年財運？賭馬、麻雀、撲克定魚蝦蟹，發達秘訣如出一轍，緊記昇龍師傅提供嘅五大要訣，再校定鬧鐘11:00am起身落街走向北嚟個深呼吸，贏通街話都無咁易。
記者：許維雅
攝影：王文忠
模特兒：Lun、Mandy、Fion、雪
鳴謝：風水玄學顧問昇龍師傅
第一招 貼實土命人
大年初三要發個新年大財，靠晒馬仔咯喂，馬經？咪刨住，因為睇開賭運秘笈好過睇馬經。我唔識甚麼賭運秘笈，有請玄學大師昇龍師傅出手指點迷津：「要知道自己今日係唔係當旺，先要認清自己五行命格，閣下命格屬土，今日賭錢得心應手，係最旺財一族，命格屬金嘅朋友亦有小財落袋，木、水、火命格嘅人，今日財運麻麻，唔該貼實屬土命格朋友，因為財運有得沾㗎。」
貼士：咪同土命人賭錢！
五行屬性
想知自己五行屬性，必須清楚自己的出生年月日，以萬年曆查出當天的天干地支，以天干來定五行屬性。例如：1980年12月31日出生，即為「戊寅」日，天干為戊，即屬「土」。
鋤Dee運氣勝技術，命格旺財攞靚牌，炒人就易如反掌。Lun：「我屬土㗎，四條Dee、四條A、一條同花順，發達喇。」
萬年曆查詢：
http://www.dadupo.com.tw/play/calendar.htm
第二招 坐正財位
命格非當旺？都唔使太灰心，仲有其他辦法催旺財運，「我平時都會帶學生去賭場實戰，」昇龍師傅話：「其實不論馬場定住宅，大家賭錢嗰陣，一定要跟住財位坐，坐啱財位自然易贏錢。」根據奇門遁甲，師傅計算出每個時辰不同嘅財位，跟住以下時間表賭錢，話之你串Q單棍定孖寶，贏面都大啲。大家仲要留意入場賭馬都要行啱門口，今年坐北偏西北嘅火車站入口旺氣較差，相對巴士停車場公眾席正門入口坐西偏西南，由此入場較易贏錢。
貼士：由公眾席正門入場，有運行！
第三招 買馬記住1、6、7
初三當日為癸酉日，屬金屬水嘅馬仔相對較旺，所以有金、有水部首嘅馬名，大家要多加留意，跑出機會好大。號碼方面，1、6、7呢三個數字都係屬水或金，所以亦要兼顧。
若仍然未諗到心水，大家不妨同時參考馬會提供嘅往績數據，原來過去三年嘅農曆新年賽馬日，來自澳洲嘅五屆香港冠軍練馬師蔡約翰及來自南非的八屆香港冠軍騎師韋達都係當旺之人，勝出場數特別多，點投注？唔使教嘞啩？
貼士：韋達勝望壓一！
第四招 忌紅戴金
催財攻略重要一環，又點少得着啱顏色衫？初三當日，着黃啡二色衫最旺財，其次金白二色衫亦有利財運，黑藍二色衫唔着好過着，無謂破財。大家勿以為新年流流着紅色可冲喜，原來今日最唔利紅色，易惹口舌兼破財。若然無啡黃色衫，師傅提議戴金黃色飾物或肖牛、羊、狗及龍嘅配飾輔助財運。
貼士：金Bra笠上身！
第五招 11:00am準時落街
殺入馬場，師傅強調仲有一招必須做足，呢招叫奇門出行財方術──今日11:00am出門口，以自己屋企為中心點，向正北方行幾分鐘，稍作停留深呼吸，盡吸旺氣先搭車入馬場。若走錯方位，如南方，大件事啦，死門之方必破財，實輸錢！每日奇門出行財方向都有唔同，初四要11:00am出門向正南走，初五要11:00am出門向正東走。
貼士：向北走橫財易到手！
入場節目多
一年一度的「農曆新年賽馬日」節目豐富，有汪明荃同林峯獻唱、蘇施黃同觀眾玩有獎遊戲、風水顧問麥玲玲指點開運秘笈，更有「周大福黃金藝術珍品展」展出全港最大「馬到功成」純金手製馬蹄鐵等總值五百萬展品。所有入場人士均可獲贈「2008國泰航空香港國際賽事冠軍名駒」電話繩套裝及《牛年暢旺即擦即獎》幸運擦擦卡一張，有機會贏取一両重足金馬蹄鐵等豐富獎品，總值高達一百四十萬元。有朋自遠方來，必定要帶佢入場玩吓，因為當日所有遊客可以免費入場。
農曆新年賽馬日
入場時間：10:25am
入場費：$10
查詢：1817