出埠吃喝玩樂會破財，但有樣嘢叫小財唔出大財唔入，跟住財星去旅遊，沾染些少旺氣，分分鐘帶挈你發到年尾！今年去邊個方位旅行最發？邊幾個國家又少去為妙？我哋請靚女神婆戴子珽預測牛年發財位！
記者：劉嘉蕙
毋懼破財照北上
問戴子珽今年會去邊度旅行，佢自言好少理，照樣北上破財！「去年拍電視節目時匆匆去咗大陸幾個地方，所以好想去四川同九寨溝睇風景、去福建買茶葉、仲想去雲南……」講起旅遊經，神婆滔滔不絕。
東南方吸財
經過連日電視節目同廣告疲勞轟炸後，相信大家發開口夢都識得講今年八白財星係喺東南方！不過千祈唔好輕率地諗住逢東南亞都中喎！請睇吓地圖，其實以香港為中心點咁計的話，東南亞國家之中，泰國、越南、馬來西亞等，位置上都屬於香港嘅西南方，未係好正㗎。有心去旅行順便吸水的話，菲律賓同峇里先係東南之中嘅正東南！
峇里財色兼收
其實話之你係咪求財，2009年嘅陽光與海灘，首選一定係峇里。峇里旅遊業呢幾年越戰越勇，去年一口氣連開幾間超豪靚靚resort，好似勁有海角天涯feel嘅KarmaKandara、富豪奢華品牌St.Regis，及走潮友路線嘅AnantaraSeminyak等，成為不少新婚夫婦搞婚禮或honeymoon熱點。牛年，不論你度蜜月、預支蜜月或補蜜月都好，一於拖honey去峇里，呢啲先叫財色兼收！
AnantaraSeminyak
房價：每晚$2,832起
查詢： http://www.anantara.com
TheSt.RegisBaliResort
網址： http://www.starwoodhotels.com/stregis/index.html
套票：國泰假期TheSt.RegisBaliResort精選套票，包來回機票，三晚酒店住宿、早餐及旅遊保險，$9,949起。
KarmaKandara
網址： http://www.karmakandara.com/
套票：國泰假期KarmaKandara精選套票，包來回機票、三晚酒店住宿、早餐及旅遊保險，$7,529起。
查詢：27476070（國泰假期）
菲律賓谷財運
擁有四十幾個島嶼嘅愛妮群島（ElNido），最近在日韓遊客間人氣急升的resort新貴。全島只有兩間酒店、密度低、零污染，海底能見度達30米，潛水迷去到一定唔捨得走。另外，島上最出名觀賞石灰岩島，玩攀石非常刺激，最重要係，多碰土石有助催谷財運！
必買手信
ElNidoResorts
房價：LagenIslandResort雙人房每晚$2,303起，MinilocIslandResort雙人房每晚$1,563起
查詢： http://www.elnidoresorts.com/
西南旺偏財
錢就係錢，理得佢係正定偏！你我都想快快手一步登天，戴子珽話今年六白偏財方位係西南！聽到呢個答案，香港人都應該好高興，因為澳門正正位於西南面，而最近Sofitel旗下嘅十六浦索菲特大酒店及娛樂場又隆重登場，以後禮拜六日冇事做，一於約班friend食食偏財運咯！
澳門十六浦度假村酒店
地址：澳門內港巴素打爾古街
網址： http://www.ponte16.com.mo/
房價：雙人房每晚$1,490起
邪氣軸心咪亂去
正所謂風水輪流轉，有福地又點會冇黑仔地？睇完今年發財福地，不如又睇吓有邊幾個方位少去為妙？
正西：如西歐、印度等
二黑病符星，易生病或出現水土不服等問題。
正北：如俄羅斯、北京、日本等
五黃死符星，容易破財。
2月出遊吉日
假如你同我一樣，諗住吼新年過後淡季機票平先去旅行，mark住以下幾個旅遊吉日（西曆計算）。戴神婆仲提提大家：「屬牛朋友今年係本命年，不宜遠行。冲太歲嘅羊人，及刑太歲嘅狗人，今年就要多走動。」
2月6日：求財：南，求貴人：東南
2月11日：求財：西，求貴人：西
2月15日：求財：東，求貴人：西南
十二生肖增運法
旅行，出發前九萬樣嘢要做決定，尤其女人，諗吓帶乜衫去、叫邊隻腳去，都可以搞幾日。記者着戴神婆做個十二生肖旅遊方位、開運色及招財貴人指南，讀者可試吓跟單執藥，將運氣指數加倍！
