蔡卓妍（阿Sa）在鼠年經歷多變，因拍檔鍾欣桐（阿嬌）爆出淫照風暴，她由組合Twins成員暫變獨立歌手，一個人在外硬拼，所幸成績不錯，廣告和登台演出應接不暇，外界都覺得阿Sa絕對可以獨當一面發展，不過她卻說：「無論一個人工作嘅成績係點，我都希望可以同阿嬌一齊再工作。」她的牛年願望，正是希望Twins能夠早日全面復出。
今個農曆新年蔡卓妍極有可能在工作中度過，因為她正忙於與台灣靚仔賀軍翔拍攝偶像劇《呼叫大明星》，她直言自入行以來，每次農曆新年的首個願望均是可以有時間休息，盡情狂食狂睡，但談到心中最想成真的願望，阿Sa日前在中環接受訪問時說：「希望Twins快啲出嚟！」
今年出個人專輯
去年因拍檔鍾欣桐捲入淫照風暴，令Twins被迫在娛圈暫時消失，阿Sa要硬着頭皮單拖硬闖，她說：「我同阿嬌合作咗咁多年，一路都冇諗過要分開，今日呢個成績係我哋一齊努力得番嚟，所以唔會咁輕易放棄，𠵱家只不過係暫時分開工作，就算一個人工作嘅成績係點，我都希望同阿嬌一齊再工作。」
獨自在娛圈硬拼，阿Sa成績相當不錯，她坦認過去一年的工作形式有很大改變，但仍積極面對，對自己的表現也感滿意，因為有機會作不同嘗試，其中最難忘是與林志穎和張智霖等人合演舞台劇，完結後令她相當不捨。
提到一個人努力絕有可能比兩個人合作賺更多錢，阿Sa說：「我冇刻意去計上年賺多定少，相信差唔多，但我反而覺得工作機會不絕先係最難得。」既然成績不錯，有否想過真的獨自發展？她表示全由公司決定，據知公司已決定上半年為阿Sa推出個人專輯，阿嬌則先以廣告及電影作復出，下半年Twins才有可能再與大家見面。
豪封逾萬元利是
踏入牛年，阿Sa笑言總會令她想起有「牛華」之稱的劉德華，雖然她曾與華仔合作電影，二人更有親密對手戲，但阿Sa始終覺得華仔有種遙不可及的感覺，她笑說：「我當初聽到啲人叫華仔做『牛華』，以為係有搞笑成份，後來啲人解釋話因為佢屬牛，同埋佢好似牛咁勤力成日都唔停咁做，我又覺得好有道理。」今年阿Sa預了最少5位數字封利是派給工作人員，希望大家都財源滾滾來，笑口常開。
採訪：麥佩儀
攝影：陳順禎
髮型：Daniel（ChinG）
化妝：NatalieSoo
場地：ChinG
部份服裝：HarveyNichols
