玖源（827）係國策扶農股落後一員，預期PE仲係單位數，踏入牛年，望玖源翻一番。玖源主打化肥及BB肥，單係08年半年度（6月底止），集團純利就翻咗一番，到3850萬銀（人仔．下同），兼且逼近07年度純利4140萬銀。玖源上半年度純利搶升，主要係因為技術改進，毛利率大幅改善所致。但要咁睇，就算當08年全年度收入，只係維持到07年度水位，單憑新嘅技術改進優勢，足以令毛利改善，兼足夠推高集團全年純利。
再講，阿爺呢期谷內需，其中一項係繼續落實扶農政策，照計好似玖源呢類化肥企業，亦都側面受惠。保守計數，玖源08年度純利增長，只係去到25%，純利5170萬銀，預期PE都係得8倍單位數。玖源現價（8仙）翻一番到0.16元計，預期PE都係講緊得16倍，喺一個keep住有增長嘅行業睇，目標PE，仍然唔係貴。
泛海折讓吸引到痹
泛海集團（129）連酒店資產重秤，最新每股NAV講緊0.56元，現價得6.2仙，折讓高達88%。又泛海市值6.9億銀，攞中環泛海大廈樓面面積13.3萬平方呎做個參考，計計數，市值相等泛海大廈每方呎5300幾蚊。就算金融海嘯，泛海大廈呎價都無理由落到咁平，而單一物業，亦應該超過泛海本身市值。
講折讓，泛海真係吸引到痹。博泛海NAV折讓，係咁意收窄到80%，泛海現價係講緊要升77%到0.112元，目標NAV折讓，仍然係大到無倫。
錢雋