大年初三，赤口，指定傳統活動──拜車公！車公夠靈，大家喺上個逆境都見識過，去年底，我哋又再面對逆境，又點可以唔搵車公再指點吓迷津。一於聽聽司徒法正師傅教路，夾定吉時，仲要逆時針轉風車轉走衰氣。齊齊祈求「海嘯」速速退，仲有，高官們要喺度為香港求支上上籤……
記者：黎頌詩
攝影：譚盈傑
Model：Vanessa&Ceci
鳴謝：司徒法正師傅
乜有兩個車公？
絕大部份香港人都知道沙田有車公，但其實仲有一個車公喺西貢蠔涌。據聞車公係南宋名將，宋末護駕南下香港中途病死，當時村民建廟供奉以表彰佢嘅忠心，亦即係𠵱家蠔涌嘅車公古廟。至於沙田車公，原來係蠔涌車公嘅孫，話說到明末，沙田有鼠疫，西貢村民就俾沙田嘅村民帶走車公孫兒嘅神主牌。神主牌坐鎮沙田三日，瘟疫消失，村民即時要建廟答謝神靈，同希望車公孫日後都多多保佑啦，呢間，咪變成沙田車公廟囉。
入廟前話你知
今日唔係車公誕
年初三拜車公，已經係好多年以嚟香港人嘅一個習俗，因為咁，唔少人都以為，初三就係車公誕。咁就搞錯晒啦，查實車公誕係初二，即係噚日呀！不過因為傳統初三赤口不宜拜年，所以多數人就揀今日拜車公啫。人多仲熱鬧，出發啦！
大圍站更近
「去車公廟就梗係喺港鐵車公廟站落車！」如果你咁諗，唔多啱喇。睇地圖，車公廟位處車公廟站同大圍站之間，由兩站前往都要行一段路，不過經我哋實試，發覺由大圍站B出口出發會較快較方便，平日行5分鐘即到。不過今日萬人空巷，大家醒少少，留意警方嘅安排啦。
提早趕吉時
司徒法正師傅指，今年拜車公嘅最佳吉時係早上嘅9點至11點，以及下午3點至5點，而無咁好嘅則係清晨5點至7點，同埋上午11點至下午1點呢兩段時間，如果大家堅持要趕吉時，就要提醒你啦，今日拜車公嘅人以十萬計，肯定要排隊一段時間方能入廟，要提早啲出發啦。不過計我話，拜神最緊要係心意，唔使太執着啦。
輕裝出發一樣得
至於祭品，按俗例會有燒肉、雞同衣紙等，但司徒師傅就話今日人山人海，基本上應簡得簡，因為你根本無乜時間同空間位置做咁多儀式同供奉大量祭品，所以基本上一套香燭及車公衣紙便可，都係最緊要是誠心！而車公衣同香燭喺廟內就可買到，所以輕裝出發都無問題。
參拜有規矩
參拜車公，一向都好有獨特色彩，如入廟打天鼓告知神靈，同轉風車等。不過由於車公廟香火鼎盛，尤其係初三今日，善信極多，所以每年都會特別安排參拜路線，唔可以為所欲為。所以要搵車公祈福，就先要搞清規矩。
1.側開入廟
平日我哋入廟就梗係行正門啦，不過今日實施特別措施，所有善信都要由面向車公廟路嘅側門進入，順住廟方嘅安排參拜，而正門只會做出口。咁安排係為咗大家可以安全又順行咁拜祭，唔好搵錯入口。
2.先買香燭風車
平日風車同香燭檔會設喺正門，今日就會移到側門旁邊，要買香燭都要喺呢個時候。大大小小嘅香燭同車公衣選擇唔少，邊款啱你？可以向職員請教。而廟內嘅風車攤檔都只係設喺呢個位，想拜完先買風車就要到廟外先有啦。
全場最巨型6呎8吋限量版香燭（右），售$3,288，要預訂，下年請早！可即場買最人氣4呎8吋大香燭（左），售$998
3.專人代點香
為咗大家嘅安全，廟內唔可以自行生火點香，所有香燭都要交畀廟內嘅工作人員代為燃點。認住大殿左前方呢個點香區，大小香燭，喺呢度點好先開始參拜。點香前，仲可以喺旁邊做埋功德。
4.由外拜到內
參拜要由外而內，先在外面上香誠心參拜後，才進入正殿。正殿外有三個香爐，要各上香三炷。超級巨香亦要喺呢個時候交畀職員，等佢哋同你穩穩陣陣咁插好。你帶嚟嘅肥雞燒豬等祭品，都係時候拎出嚟啦。
5.衣紙交畀佢
點香燒衣，本來係拜神嘅指定動作，不過基於環保理由，車公廟本身並無設置化寶爐。咁點算？唔使擔心，認住呢啲聚寶車啦。將車公衣同元寶放入去，廟方就會有專人代化寶，你哋對車公嘅心意唔會被忽略㗎。
6.三炷香入正殿
喺殿外祭壇參拜完，就可以入大殿。跟據規定，你只係可以帶三炷清香，相信大家都唔會介意。如果要求籤，就記得先攞籤筒。於大殿誠心下跪，一籤只可以問一事，唔能夠貪心。
7.$10解籤
解籤嘅地方設喺廟嘅左邊，大家記住籤號就可以去解籤處用$5拎籤紙，再畀$10就可以搵人解籤。其實呢個價好多年無變啦。咁經濟，問開嘢，梗係問多幾樣！
8.打天鼓轉風車
最後，到拜車公獨有指定動作：打天鼓同轉風車！傳統入廟打天鼓，不過𠵱家天鼓喺大時大節先出現，而且要參拜完先有得打。人人要轉嘅風車都係放喺同一地方。司徒師傅提醒大家：「如你往年是好運或一般，就順時針轉；如是不好運或很差，就要逆時針轉。千萬不可搞錯，否則由好變差就大件事！」
順風順水吉祥物
拜車公梗唔少得買番個風車拎返屋企旺一旺啦，全場最強肯定係38頭巨型風車，仲有一定要推介嘅新產品——寓意有樓有米嘅新潮風車，好意頭又超可愛。除咗風車，廟方仲推出咗唔少新嘅吉祥擺設。職員話，由於經濟唔好，唔少產品定價都底咗！
