08年尾全球被金融海嘯洗到亁晒塘，為免人人勒緊褲頭唔使錢，政府初二煙花滙演再爆射23,888枚迎牛年，仲破天荒喺天空撩一大堆「牛」字出嚟，務求牛氣冲天、09牛市再現！今日就教埋你影煙花十式，將呢五百幾萬煙花靚景盡收自己DC門下。
記者：徐影龍
攝影：梁細權
Model：Eriko、Fiona@StageModels
煙花主題率先睇
恭喜發財
未放煙花，先以炮仗聲揭開滙演序幕，然後「8」字高掛天空，讓港人發唔停，重頭戲以黃色煙花寫出「牛」字。
財神到
每年必有財神主題，漫天金元寶，拼出七彩富貴牡丹圖，祝港人生活安定。
歡樂年年
大紅「吉」當空，加埋用煙花做出蝴蝶、蜜蜂同螢火蟲，象徵生生不息。
花開富貴
以煙花表達拉手花、金波變彩色櫻花、穿梭帶環、大麗花等，花氣洋溢。
大愛世界
延續奧運大愛精神，以音樂帶出橄欖皇冠，綠暗金游星等煙花漫天飛舞。
新春新希望
用煙花造出天使秀髮效果，襯番紅綠閃爍煙花，譜出春回大地嘅樂章。
祝願東亞運
預祝香港成功申辦09東亞運動會，銀色波浪環、旋龍帶彩色拉手層出不窮。
大贏家
高速發放中國巨雷、七彩變色菊、五片花帶蕊等煙花，寓意港人無限拼勁。
春天的故事
紅、黃、橙、綠、藍閃爍及巨型銀閃爍絮柳，象徵祖國開放改革三十年。
歌唱祖國
「六」「十」字煙花，象徵新中國成立60周年，最後60秒排山倒海禮炮爆發。
影煙花最緊要慢門
咁辛苦逼到維港兩岸睇煙花，唔影番輯靚沙龍邊對得住自己。近年D-SLR連鏡套裝越賣越平，五千零蚊已買到SONY全功能α350，送埋標準鏡即刻玩得。不過影煙花同平常夜景有點不同，除咗快門要夠慢外，仲有好多事前功夫要準備。
1.擔腳架霸頭位
咪以為港九海濱多位，施施然臨近八點先到場，想霸到同海面零距離超靚位，起碼六點前要到達，除咗等開場消磨時間嘅物品外，冷鋒到，記住帶多件外套。
2.無謂相無謂影
CCD越用越熱，越熱就越多RGB雜訊，所以事前盡量避免影無謂嘢，咪學自由行咁見乜影乜，由人到機都應該以最好狀態，迎接23分鐘煙花滙演。
3.必備腳架
不論影煙花定齋夜景，腳架可算必備之物，因為拎機唔手震，最高極限大概1/8秒，影夜景唔多夠。
4.Wide得有理
近距離影維港煙花，跟機Kit鏡通常唔夠Wide（廣角），影完出嚟盞左右都唔見一忽，全無構圖可言。咪孤寒，買番支Wide鏡總唔會浪費。
5.黑位夠黑秘訣
長時間曝光，黑位雜訊變得明顯，黑位夠黑夠實先係影夜景功力所在，流行做法係黑卡或黑絨布，喺煙花與煙花間遮擋鏡頭，避免吸光過多。
6.盡收光圈
好多儍瓜DC受快門所限，NightMode會將光圈有咁大放咁大，但D-SLR就相反，應該用超慢快門遷就光圈，免得相片過度曝光而唔Sharp。
7.B快門吸光大法
D-SLR機種獨有嘅B快門，你㩒幾耐就曝光幾耐，令煙花、光位吸到夠為止，由30秒到無限不等，不過千萬小心唔好郁到部機，否則前功盡廢。
8.用最低ISO
好多DC號稱ISO（感光度）夠高，但想影得靚，ISO同光圈一樣要遷就快門，越細數值相片就越滑淨，記住唔好揀Auto。
9.紙巾柔化閃燈
想夜景夾人嚟影，少不免要慢快門加閃燈，若Power太強，會出現俗稱「硬燈」嘅低手現象。
查詢：
（a）SONY客戶熱線（23452966）
（b）DCPower（23846698）