新年，最好賣的大抵是消化餅，這是世界級應節消費。為了來年事事順境，亞洲人入口的每道都是意頭菜，髮菜生菜韭菜蠔豉年糕……說穿了都是在「玩食字」。但世界大同，同一天空下，亞洲歐洲美洲非洲，在新年大都會找藉口暴飲暴食！肥豬永遠富貴、生菜永遠發財、糖同水果永遠吉祥，祝大家食乜都開心、家肥屋潤、大吉大利、橫財就手、龍馬精神、出入平安！
記者、部份攝影：陳慧敏
鳴謝：台灣觀光協會、長榮航空
葱滿勝算
台灣勁食意頭
唔吉利嘢唔講，但一場海嘯，台灣連年宵都早於1月10號就開始，所有年貨價格輕微下調（罐頭鮑魚比去年平了約$6一罐）好抵買，廸化街的年貨市場連星期一都迫滿人。同我哋一海之隔的台灣，一樣食湯圓食葱食海鮮代表團圓、聰明同年年有餘。不過人家湯圓有十款、宜蘭三星葱食品周街全年賣盛產的烏魚子、魷魚絲等更多由二奶命的小食，升格做拜年必備食品！
台北廸化街年貨市場
網頁： http://www.2009newyear.com.tw/
財源滾滾
西方人好鍾意塞嘢入食物裏，吃時誰找到了，下一年就大吉大利做貴人。如希臘、新奧爾良有個King'sCake，好難食的超甜蛋糕裏會塞了個公仔或銀幣，食中公仔的人可以做一晚皇帝，仲可挑選一位女性做一晚女皇。英國人都塞錢入椰菜做大雜燴，邊個食中邊個有運行，熱鬧又好玩呢！
英國富貴椰菜
層層叠的菜都係錢的象徵，大抵源自最初有銀紙之時，農民將錢叠埋一嚿塞入袋，買嘢時就一嚿的拿出來慢慢拆慢慢數。洗菜就好似一層層數錢一樣，所以椰菜、芥蘭、羽衣甘藍等都是好運菜。
德國魚鱗當銀仔
中國人食魚就年年有餘，德國人仲刁鑽，唔係乜魚都得，只係銀色魚鱗的才可以！因為銀色魚鱗閃閃令像銀幣，有啲人仲會放幾塊魚鱗喺銀包扮錢，話可以帶來好運。真係無人嫌錢腥㗎！
馬來西亞搏命撈起
這個大家都好熟啦！馬來西亞盛產海鮮，一邊將魚生、生菜絲、西芹絲、紅蘿蔔絲、花生碎、薑絲、酸梅膏加桔子汁同糖水砌好時，一邊講吉祥說話，砌起後成村人就撲埋去一路撈一路噓噓聲撈起撈起的喊，越嘈越好，一堆人瞬間就撈到風生水起！
吉星拱照
食嘢占卜，無論趨吉避凶或追女爛橋都一樣受落。我搞唔清落咖啡的奶攪左或右代表吉祥；而茶渣占卜我飲咗大部份，有冇影響神喻？
西班牙、葡萄牙、古巴、秘魯
午夜食葡萄
元旦，歐洲同美洲國人都愛拿住抽葡萄等，等12點的除夕鐘聲一響，就一路嗌住個月份一路吞12粒葡萄，吞中邊個月份的葡蔔係甜就有好事，酸的就要醒醒目目了。
日本、美國
曲奇傳紙仔
堪稱最難食的曲奇，原來源於日本，於美國唐人街餐館發揚光大，難得美國人鍾意食。裏面一張「忠告」的紙仔由日本人原意只得幾十款的詩詞，變成萬幾款的預告紙仔，賣足百幾年。
眉精眼企
即使好似端午節要食糭一樣，美國人新年勁食眉豆。一來佢個樣夠精靈似眼仔，二來南北戰爭時美國穀物盡燒，個個靠食眉豆執番身彩，於是新年食眉豆寓意大步檻過！
美國食豆有運
眉豆食法眾多，但大時大節，大食的美國人有道菜叫HoppingJohn，以眉豆配大盤肥火腿、芝士、菜同類似通心粉的東西一齊煮，無咁齋。
德國落藥泡菜
肉桂是西方傳說中女巫愛用的愛情及幸運藥材料，德國人就最愛食傳統菜Sauerkraut（泡菜/酸菜），兩者溝白汁醬同煮，就成德國新年必備的幸運菜。
歐美愛食肥豬手
肥嘟嘟的豬在許多文化中向有「豐盛」的象徵，西方人仲話豬仔淨係識向前行，好有往上意味，豬肉咁fatty、juicy，都表示肥仔又豐腴，意大利人仲覺得食咗fatty就會fatteningwallets，荷包脹卜卜！
福壽延年
凡事都不能忘本，食得開心之時都要記得邊個保佑你，識時務的分番一份畀神食作敬神之用，與神同樂呀！
西藏香爐咁大全盒
切瑪盒好像全盒升級版，成個香爐般大的盆裏面有炒麥粒和糌粑，插上青穗、紅穗花跟酥油花，意指人壽年豐吉祥如意。個個來拜年，乜都唔好做住要先去切瑪度拿一點炒麥粒、糌粑向空中連拋三次賀新年。
