新年前收到陳居士一紙傳真。陳居士鑽研佛學，精於八字風水，以前曾對左丁山有所指示，佢乃係有心人，見時事而有所感，特寫下一啲指引，畀各朋友遵從，左丁山覺得不如公諸同好：
「各位港人好，起身係要早，做吓健身操。時刻都要笑，運氣一定好。唔一定要進補，鮑參加翅肚，令您血壓高；清茶加淡飯，反而身子好。
風水來布局，有下列法寶：
北方係瘟神，千祈咪動土，要放安穩水，可減去煩惱。
西方係病神，放個銅葫蘆。
東方叫三煞，要用水養草。
東北名戰神，紅紫係法寶。
講完啲衰嘢，當然要講好。
東南正財位，放把風扇度。
西北名官貴，要明潔方好。
西南係偏方，見水局最高。
南方文昌位，富貴竹可補。
最緊要勤力，每日搵工做。
國家要團結，社會要和諧。
家庭要和睦，咁就大家好。
祝願此牛年，經濟早復甦。」
陳居士既然關照贈言，跟佢說話辦事，有利無害，剛好小YY話搬屋，佢嘅朋友室內設計師亦搬屋，居然問左丁山新屋方向有何避忌，左丁山於是將陳居士之傳真本畀佢睇，小YY話：「我連新屋嘅東南西北方向都分唔清，等我買個指南針睇吓先。」朝頭早起身望吓太陽在何方，就知道東南西北啦，何須指南針？當然如果要計算到分毫不差，就要由專業風水師用羅盤睇清楚。原來風水師之言，對市場有啲影響力，去年曾有人言及大門向南者，宜放灰色膠氈，於是某大屋苑商場內之3M灰氈賣到斷市，紅色就滯銷，3M呢類美國公司如要在大中華地區賣多啲產品，大可一早搵定風水意見先。