做特首都有指定動作，煲呔之前去安老院向長者派禮物拜早年，噚日年三十晚，輪到署理特首唐英年出動，去九龍塘禧福道亞洲婦女協進會何梁潔庭頤養之家護理院探望老人家，新聞處指噚日唐唐係以政務司司長身份出席呢個活動。
煲呔大派禮物，唐唐都唔可以兩手空空吊吊fing上門，佢同長者逐一握手，又向每位老人家送上一盒蛋卷，仲唔止，更親自幫院內長者𢳂飯，以示敬老而且同佢哋一齊食團年飯。唐英年話，喺年三十晚探訪長者，係因為長者過去對社會有貢獻，希望市民都發揮敬老精神，多啲關懷長者，祝長者笑口常開，長命百歲。
特首放假，唐英年呢個新年唔得閒要做多份，花車滙演、賀年煙花都要捧場，大年初三沙田馬場賀年盃，又係佢頒獎。