今日年初一，但仍未正式算係牛年，因為戊子鼠年在節氣上要在二月四日立春日先至完結，己丑年在二○○九年二月四日○時五十分正式來臨，計八字就係己丑年、丙寅月、庚辰日、丙子時，日元屬庚陽金，己丑年呢隻牛係金牛，與戊子年之木鼠不同。
翻查番二○○八年二月七日年初一「GG細語」，舊年八卦邱話鼠年利火，唉吔，去年年初的確有大火災，好嘅唔靈醜嘅靈；利屬火股票喎，的確係威過一陣嘅，油價曾升到○八年七月十一日之一百四十七美元一桶，但之後就散晒，軟到現在。舊年又講過木旺金囚，金融股疲弱、地產可能唔掂！總之睇番轉頭，八卦邱預測起碼啱咗六成，可惜自己未能跟到足，例如不早賣滙豐，後悔莫及。
講番牛年立春，八卦邱話：「書云正月庚金，木旺之際，有土皆死，土死便不能生金，況且春寒未解，庚金要有丙火取暖，有甲木疏土，先至可以暖金破厚土而出。睇番立春八字，三土（己丑辰），二火（丙），一木（寅），一水（子）、一金（庚），金木水火土齊全。最重要係有丙火照暖兼火生土，有土就可以生金啦，只係忌土厚埋金啫，但正月就係寅月，寅內藏甲木與丙火戊土，姑且亦算有木疏土，可惜甲木未有透出，係少少遺憾。但綜合嚟睇，立春日元庚金，最主要用神為丙火，己丑年之庚金可算幾強勢。」
庚金強又如何？八卦邱話金強就會洩土劈木生水，以此測市，地產洩氣，金融復甦，屬木行業有衝擊（如紡織印刷），屬水行業有生機（如旅遊）。咦，係唔係呀？左丁山好希望金融業復甦，銀行業唔好裁員呀，尤其是滙豐股價跌到殘，全港不知幾多大家族、老牌家族、大學基金、慈善基金、中產階級、退休人士受影響，如果滙豐能夠反彈，功德無量，全港開顏。幾時先至會復甦呢，記得梁玳寧大姐引述傅會長之言，八月七日之後喎。八月七日後就係農曆七月嘅開始，進入秋天，秋天利金，農曆七月又係壬申月，壬申納音係劍鋒金，銳不可當，金氣大旺。因鼠年金融意外之事太多，受過教訓，𠵱家唔敢講得太實在，慢慢睇啦！